DOG - Xunta de Galicia -

Diario Oficial de Galicia
DOG Núm. 26 Martes, 06 de febreiro de 2007 Páx. 1.595

I. DISPOSICIÓNS XERAIS

CONSELLERÍA DE EDUCACIÓN E ORDENACIÓN UNIVERSITARIA

DECRETO 10/2007, do 25 de xaneiro, polo que se regula o funcionamento dos comedores escolares nos centros docentes públicos non universitarios dependentes da Consellería de Educación e Ordenación Universitaria.

A Consellería de Educación e Ordenación Universitaria é o órgano da Administración da Comu

nidade Autónoma de Galicia ao que lle corresponden, entre outras, as competencias e funcións en materia de planificación, regulación e administración do ensino regrado en toda a súa extensión, niveis e graos, modalidades e especialidades, incluída a xestión dos servizos educativos complementarios.

O marco xurídico autonómico que regula na actualidade o servizo de comedor escolar recóllese basicamente no Decreto 16/1984, do 9 de febreiro, polo que se regula o funcionamento dos comedores escolares (DOG do 29 de febreiro), modificado polo Decreto 283/1986, do 25 de xuño (DOG do 14 de outubro) e polo Decreto 443/1990, do 13 de setembro (DOG do 27 de setembro).

No transcurso destes anos, a realidade social vén demandando das administracións públicas unha nova regulamentación do servizo de comedor escolar nos centros docentes públicos. Este servizo educativo ten un carácter complementario, compensatorio e social, especialmente destinado a garantir a efectividade da educación obrigatoria dentro dos principios de igualdade, en especial entre homes e mulleres, e solidariedade.

Pola súa banda, o artigo 82.2º da Lei orgánica 2/2006, do 3 de maio, de educación, LOE (BOE do 4 de maio), establece que as administracións educativas prestarán, en determinados supostos, de forma gratuíta os servizos escolares de transporte escolar e, se for o caso, comedor.

Resulta, pois, necesario neste momento establecer un marco normativo que, de acordo coas previsións legais existentes, concrete, mellore e adecue o réxime xeral de funcionamento do servizo de comedor escolar nos centros públicos dependentes da Consellería de Educación e Ordenación Universitaria, que permita dar resposta ás demandas reais e actuais ao respecto.

Na súa virtude, por proposta da conselleira de Educación e Ordenación Universitaria, en uso das atribucións conferidas pola Lei 1/1983, do 22 de febreiro, reguladora da Xunta e do seu presidente, modificada pola Lei 11/1988, do 20 de outubro, conforme os ditames do Consello Consultivo e do Consello Escolar, e logo de deliberación do Consello da Xunta de Galicia na súa reunión do día vinte e cinco de xaneiro de dous mil sete,

DISPOÑO:

Capítulo I

Disposicións xerais

Artigo 1º.-Obxecto e ámbito de aplicación.

1. O presente decreto ten por obxecto a regulamentación do funcionamento dos comedores escolares nos centros docentes públicos non universitarios dependentes da Consellería de Educación e Ordenación Universitaria que impartan os niveis de ensino obrigatorio e/ou segundo ciclo de educación infantil.

2. Entenderase como servizo de comedor os servizos de xantar e de atención aos usuarios nos períodos de tempo libre anterior e posterior, nos cales se fomentarán programas de promoción da saúde, hábitos alimentarios e habilidades persoais.

3. A consellería garantirá, mediante a modalidade que considere máis conveniente, a prestación do servizo de comedor escolar ao alumnado a que se refire o artigo 8º do presente decreto, tendo en conta, en todo caso, o disposto na disposición transitoria do presente decreto.

Artigo 2º.-Modalidades de prestación do servizo.

1. O servizo de comedor prestarase nalgunha das seguintes modalidades:

a) Xestión directa polo propio centro, por medio de persoal funcionario, docente ou non, e por persoal laboral, dependentes da Consellería de Educación e Ordenación Universitaria, que exercerán as funcións que se regulen na orde de desenvolvemento deste decreto.

b) Xestión directa mediante a elaboración de comidas centralizadas en cociñas propias con persoal da Administración, e transportadas a outros centros docentes próximos, contratando o mencionado servizo cunha empresa do sector hostaleiro.

c) Contratación da subministración de comidas preparadas ou da elaboración de comidas nas dependencias do centro a cargo dunha empresa do sector hostaleiro adxudicataria do servizo polo procedemento que corresponda.

2. As modalidades utilizadas con carácter xeral serán a) e b); cando iso non sexa aconsellable e estea debidamente xustificado, prestarase o servizo pola modalidade c).

3. Excepcionalmente, a Administración educativa poderá colaborar na xestión e organización do servizo cos respectivos concellos, deputacións ou outras institucións públicas ou privadas, así como con outras entidades ou colectivos, como poden ser as asociacións de nais e pais de alumnos e as súas federacións.

4. Nos centros que, existindo ensinanzas de hostalaría e/ou similares, requiran a realización de prácticas de cociña e funcione a un tempo o servizo de comedor escolar, a Consellería de Educación e Ordenación Universitaria e os responsables do centro deberán acordar o establecemento dunha xestión directa singular, tanto no económico como no funcional, que permita compatibilizar e rendibilizar ao máximo o desenvolvemento da docencia práctica das citadas ensinanzas e unha correcta prestación do servizo de comedor.

Artigo 3º.-Contratación do servizo.

1. Cando o servizo de comedor escolar sexa xestionado mediante contratación cunha empresa do sector hostaleiro, esta realizaraa a Consellería de Educación e Ordenación Universitaria.

2. Así mesmo, nos casos en que o servizo se preste baixo a modalidade recollida no artigo 2.1º b) deste decreto, será a Consellería de Educación e Ordenación Universitaria a encargada de realizar a correspondente contratación para transporte e subministración das comidas aos centros afectados.

3. A contratación do servizo de comedor escolar rexerase polo disposto na lexislación xeral de contratos das administracións públicas e polos pregos de cláusulas administrativas particulares e de prescricións técnicas que para o efecto se aproben.

Dentro dos criterios de valoración que se fixen para a adxudicación do mencionado servizo, valorarase de xeito especial aquelas empresas que acrediten o desenvolvemento dunha política de igualdade entre homes e mulleres na súa liña de contratación de persoal.

Capítulo II

Normas de réxime administrativo dos comedores escolares

Sección primeira

Establecemento e autorización de apertura e funcionamento

Artigo 4º.-Apertura e funcionamento.

1. A Consellería de Educación e Ordenación Universitaria poderá autorizar a apertura e funcionamento do servizo de comedor escolar nos centros citados no artigo 1º.1, sempre que conten coas instalacións e medios adecuados para a prestación do servizo; así como coas autorizacións e informes preceptivos para a súa apertura e funcionamento.

2. O procedemento que regule a apertura e funcionamento do servizo de comedores escolares determinarase nunha orde de desenvolvemento deste decreto.

Artigo 5º.-Categoría de comedores escolares.

Os comedores escolares agruparanse nun máximo de cinco categorías (A, B, C, D, E), independentemente da modalidade de xestión por que se opte, que será determinada polo número de comensais usuarios do servizo de comedor segundo se establece:

-Tipo A: ata 75 comensais.

-Tipo B: de 76 a 150 comensais.

-Tipo C: de 151 a 250 comensais.

-Tipo D: de 251 a 350 comensais.

-Tipo E: máis de 351 comensais.

Sección segunda

Organización e administración

Artigo 6º.-Organización, administración e xestión económica.

A organización, administración e xestión económica dos comedores escolares corresponde á comu

nidade educativa do centro, representada polo consello escolar, que exercerá as funcións que se establezan neste decreto e nas súas normas de desenvolvemento.

Sección terceira

Funcionamento interno do servizo

Artigo 7º.-Protocolo de funcionamento.

Os equipos directivos de cada centro que preste o servizo de comedor elaborarán un protocolo propio de funcionamento segundo se estableza nas normas de desenvolvemento deste decreto, con especial atención ao cumprimento do principio de igualdade entre homes e mulleres.

Artigo 8º.-Usuarios do servizo de comedor.

1. Poderán ser usuarios do servizo de comedor escolar:

a) Todo o alumnado do centro, correspondendo ao consello escolar do centro a selección e admisión nos casos en que o número de solicitudes supere o de prazas dispoñibles, o tempo que se procurará a ampliación do comedor acorde coas demandas existentes.

b) O persoal encargado da atención ao alumnado usuario do comedor, independentemente da súa categoría e relación de emprego.

c) O profesorado e persoal non docente do centro que solicite o servizo, sempre que existan prazas vacantes, e se dispoña de persoal colaborador suficiente para a atención ao alumnado.

2. A selección e admisión de usuarios do servizo de comedor escolar farase consonte os criterios de prioridade que se establezan nas normas de desenvolvemento deste decreto.

Artigo 9º.-Persoal responsable do funcionamento do comedor escolar.

1. O cadro de persoal que preste servizos de atención ao alumnado usuario do comedor escolar será fixado nas normas de desenvolvemento deste decreto seguindo criterios obxectivos, e virá determinado segundo a modalidade de prestación do servizo.

2. En todo caso, o persoal laboral encargado da cociña do comedor escolar poderá estar integrado por oficiais 2ª de cociña e axudantes de cociña; e o seu cadro de persoal determinarase en función da categoría do comedor.

Sección cuarta

Garantía de calidade do servizo

Artigo 10º.-Elaboración de menús.

1. A elaboración dos menús realizarase de tal xeito que proporcione aos usuarios unha dieta equilibrada, contribúa ao seu mellor desenvolvemento e favoreza

a adquisición de hábitos alimentarios saudables. Os devanditos menús poranse en coñecemento do consello escolar do centro.

2. O menú será único para todos/as os/as usuarios/as do servizo de comedor, salvo nos casos de alumnas/os que teñan algún tipo de intolerancia ou alerxia alimentaria, medicamente documentada. Estes menús serán autorizados polo consello escolar, de acordo coas normas que se diten en desenvolvemento do presente decreto, e estarán xustificados mediante certificación médica. Se for o caso, o centro facilitará os medios para a conservación e consumo do menú proporcionado pola familia.

3. A Consellería de Educación e Ordenación Universitaria elaborará e divulgará protocolos ou guías relativas ás necesidades nutricionais do alumnado, o fornecemento calórico dos nutrientes e as características gastronómicas de cada estación do ano, para o que se contará con persoal experto en nutrición e dietética.

Artigo 11º.-Seguranza e hixiene.

Independentemente de cal sexa a modalidade de prestación do servizo de comedor escolar, sempre se deberán cumprir os requisitos exixidos de control de calidade establecidos na lexislación vixente sobre o control sanitario dos alimentos, da súa manipulación e da súa distribución, ademais dos específicos que aprobe a consellería competente en materia de sanidade e os concellos. Así mesmo, deberán someterse aos sistemas de control externo ou programas de autocontrol que establezan os procesos de homologación.

Capítulo III

Réxime económico-financeiro da xestión dos comedores escolares

Artigo 12º.-Gratuidade e beneficiarios/as da axuda para comedor.

1. Serán beneficiarios/as da totalidade da axuda para o servizo de comedor aquel alumnado que sexa beneficiario do servizo de transporte escolar. Tamén disporá do servizo de comedor gratuíto o persoal, docente ou non, responsable do funcionamento do comedor regulado no artigo 9º do presente decreto.

Así mesmo, será beneficiario da mencionada axuda, total ou parcialmente, outro alumnado non incluído anteriormente, sempre que cumpra o requisito de renda que se estableza.

2. Deberá aboar a cantidade correspondente á axuda para comedor concedida pola Consellería de Educación e Ordenación Universitaria por alumno/a e día todo aquel alumnado, incluído os/as fillos/as do persoal de comedor, persoal do centro, docente ou non, e que non se encontren incluídos no parágrafo anterior.

Artigo 13º.-Financiamento e control de gasto.

1. O servizo de comedor escolar financiarase cos seguintes ingresos:

a) Achegas da consellería para cubrir o custo dos servizos bonificados segundo a porcentaxe que corresponda en cada caso, que se determinarán anualmente consonte o disposto no artigo 14º do presente decreto.

b) Así mesmo, existirá un fondo complementario que será distribuído pola comisión provincial de comedores escolares regulada no artigo 16º do presente decreto, e cuxa finalidade será a de atender ás necesidades específicas de cada comedor escolar.

c) Achegas dos usuarios.

d. Aquelas achegas en forma de axuda ou doazón recibida doutros organismos públicos ou privados, concedidas de acordo co disposto na normativa vixente na materia.

2. A xestión económica do comedor escolar, ademais de constar nos rexistros da actividade económica que están establecidos con carácter xeral para todos os centros docentes públicos de Galicia, constará nunha conta específica para tal fin. Así mesmo, terase un rexistro de ingresos e un rexistro de gastos do servizo de comedor, a xustificación dos cales será presentada polo/a director/a do centro á delegación provincial correspondente, unha vez aprobada polo consello escolar.

3. O estado de gastos do orzamento anual do servizo de comedor escolar incluirá tamén a adquisición de mobiliario e utensilios inventariables precisos para o funcionamento do servizo, ata un máximo do 15% dos ingresos do comedor procedentes da Consellería de Educación e Ordenación Universitaria.

4. Para o caso de créditos remanentes do exercicio anterior será de aplicación o establecido no Decreto 201/2003, do 20 de marzo, polo que se desenvolve a autonomía na xestión económica dos centros docentes públicos non universitarios.

Artigo 14º.-Prezo do servizo.

1. A Consellería de Educación e Ordenación Universitaria determinará a contía do módulo económico unitario que cubra o prezo do cuberto, en función da modalidade de prestación establecida.

2. Na determinación deste teranse en conta os custos de compoñentes tales como alimentos, menaxe, combustible, enerxía, seguros, uniformes, persoal de atención, así como calquera outro que se estableza nas normas de desenvolvemento deste decreto.

Artigo 15º.-Complementos retributivos.

O/a director/a, o/a secretario/a, o/a encargado/a do comedor e o persoal, laboral ou funcionario que exerza a función de atención ao alumnado usuario do comedor terán dereito a un complemento por ser

vizos extraordinarios, que será aboado en función dos días de asistencia ao comedor.

Capítulo IV

Normas de organización administrativa en relación cos comedores escolares

Artigo 16º.-Comisión provincial de comedores escolares.

1. En cada provincia constituirase unha comisión de comedores escolares que estará integrada polo/a delegado/a provincial da consellería como presidente/a, o/a secretario/a da delegación, o/a xefe/a do servizo provincial de Inspección, un director ou directora de centro que conte con comedor por cada zona de inspección, elixido/a polos/as directores/as dos colexios da zona en que funciona o mencionado servizo mediante votación secreta, tres representantes das asociacións de nais e pais de alumnos, designados por estas a través da súa federación, o/a presidente/a do comité de empresa a nivel provincial e o/a xefe/a do servizo provincial de Recursos Educativos Complementarios, que actuará como secretario/a.

2. A citada comisión reunirase de maneira ordinaria dúas veces ao ano. A primeira no mes de setembro, para analizar as necesidades específicas de cada comedor escolar e distribuír o fondo complementario en función delas. A segunda para verificar a xestión económica dos comedores escolares da provincia correspondente.

Artigo 17º.-Avaliación e inspección.

1. A Consellería de Educación e Ordenación Universitaria avaliará o funcionamento, a xestión e a organización do servizo de comedor escolar.

Para estes efectos, os centros docentes públicos que presten o servizo de comedor disporán dun programa anual do servizo de comedor aprobado polo consello escolar, que se integrará na programación xeral anual.

2. Correspóndelle á Consellería de Educación e Ordenación Universitaria o exercicio do labor inspector dos comedores escolares, con especial atención ao cumprimento do principio de igualdade entre homes e mulleres, sen prexuízo das atribucións que lle corresponden á consellería competente en materia de sanidade e aos concellos.

Disposicións adicionais

Primeira.-Excepcionalmente, as asociacións de nais e pais de alumnos e as súas federacións poderán colaborar nas funcións de atención ao alumnado usuario do servizo de comedor escolar. Neste suposto, aquelas asociacións que voluntariamente realicen tal función poderán percibir unha axuda do fondo complementario ao servizo de comedor, distribuído pola comisión provincial regulada no artigo 16º do presente decreto.

Segunda.-Atendendo ás características propias dos centros residenciais docentes e dos centros de educación especial dependentes da Consellería de Educación e Ordenación Universitaria, na orde de desenvolvemento deste decreto regularase especificamente a asignación e o tipo de persoal que preste servizos nestes centros.

Disposición transitoria

Única.-Para os supostos en que a admisión de usuarios/as do servizo de comedor -alumnado ou outro persoal non beneficiario de axuda ou gratuidade, supoña un incremento de persoal laboral de cociña, tal demanda será atendida de forma progresiva de acordo coas dispoñibilidades orzamentarias.

Disposición derrogatoria

Única.-Quedan expresamente derrogados o Decreto 16/1984, do 9 de febreiro, polo que se regula o funcionamento dos comedores escolares, e os decretos 283/1986 e 443/1990, que modifican en parte o anterior, así como todas as disposicións de igual ou inferior rango que se opoñan o disposto neste decreto.

Disposicións derradeiras

Primeira.-Desenvolvemento normativo.

Autorízase a conselleira de Educación e Ordenación Universitaria para ditar as disposicións precisas para o desenvolvemento deste decreto.

Segunda.-Entrada en vigor.

Este decreto entrará en vigor aos vinte días da súa publicación no Diario Oficial de Galicia.

Santiago de Compostela, vinte e cinco de xaneiro de dous mil sete.

Emilio Pérez Touriño

Presidente

Laura Sánchez Piñón

Conselleira de Educación e Ordenación Universitaria