O Real decreto 865/2003, do 4 de xullo, como norma básica ditada ao abeiro do artigo 149.1.16ª da Constitución española, determina os criterios hixiénico-sanitarios para a prevención e control da lexionelose, establece no seu artigo 13 que todo o persoal que traballe nas operacións de mantemento hixiénico-sanitario, sexa dunha entidade ou servizo externo contratado ou ben sexa persoal propio da instalación, deberá realizar os cursos que para tal efecto homologue o Ministerio de Sanidade e Consumo por proposta das comunidades autónomas correspondentes e das cidades de Ceuta e Melilla.

A Orde SCO/317/2003, do 7 de febreiro, pola que se regula o procedemento para a homologación dos cursos de formación do persoal que realiza as operacións de mantemento hixiénico-sanitario das instalacións obxecto do Real decreto 909/2001, do 27 de xullo, establece un curso cada cinco anos cunha duración mínima de 10 horas, co fin de renovar o certificado de formación e o seu artigo quinto refire que lles corresponde ás comunidades autónomas e ás cidades de Ceuta e Melilla, a través dos seus órganos competentes, o control das actividades das entidades que realicen estes cursos.

Por isto en Galicia foi publicada a Orde do 14 de abril de 2004, que regula a formación do persoal que realiza operacións de mantemento hixiénico-sanitario das instalacións susceptibles de propagar a lexionelose e o procedemento para a autorización das entidades de formación e a súa modificación do 9 de febreiro de 2005. No seu artigo 10º punto 3, expresa as condicións que deben reunir os cursos de renovación do certificado, ben que non se concreta o temario destes cursos, no relatorio de sanidade ambiental do 23 de outubro de 2007, consensuouse un temario para impartir nestes cursos de renovación.

Polo exposto, faise necesaria a modificación da Orde do 14 de abril de 2004, e por iso, no uso das competencias que a Consellería de Sanidade ten atribuídas en materia de saúde pública, e no uso das facultades que me foron conferidas polo artigo 34.6º da Lei 1/1983, do 22 de febreiro, reguladora da Xunta de Galicia e da súa Presidencia, modificada pola Lei 11/1988, do 20 de outubro,

DISPOÑO:

Artigo 1º

Modifícase o artigo 10º, no seu punto 3, parágrafo 2, que queda redactado do seguinte xeito:

«Este curso terá unha duración mínima de 10 horas e incluirá a actualización dos seus coñecementos sobre a lexislación vixente en materia de saúde pública e saúde laboral, identificación de puntos críticos e elaboración de programas de control, de conformidade co previsto no anexo IV».

Artigo 2º

Engádese ao final da orde un anexo IV.

Disposición derradeira

Única.-Esta orde entrará en vigor o día seguinte ao da súa publicación no Diario Oficial de Galicia.

Santiago de Compostela, 15 de abril de 2008.

María José Rubio Vidal

Conselleira de Sanidade

ANEXO IV

Programa para a renovación dos cursos para o mantemento hixiénico-sanitario das instalacións de risco fronte á lexionelose

-Actualización normativa da lexislación nacional e autonómica en relación coa lexionelose, prevención de riscos laborais e ambientais, entre outras: normativas autonómicas, Código Técnico da Edificación, Norma UNE 100030:2005 Prevención da lexionela en instalacións de edificios, Regulamento de instalacións térmicas en edificios (RITE), desenvolvemento da Directiva de biocidas, auga de consumo humano (1 hora).

-Boas prácticas de limpeza e desinfección. Novidades no deseño e mantenemento das instalacións. Sistemas físicos e físico-químicos. Rexistro de actuacións (2 horas).

-Metodoloxía de control de puntos críticos en instalacións de risco de lexionelose. Avaliación do risco (2 horas).

-Actualización do mantemento hixiénico-sanitario de instalacións con maior probabilidade de proliferación e dispersión de lexionela. Estrutura, prevención e control. Guías técnicas (3 horas).

-Actualización do mantemento hixiénico-sanitario de instalacións con menor probabilidade de proliferación e dispersión de legionela. Estrutura, prevención e control. Guías técnicas (2 horas).