O Decreto 126/2008, do 19 de xuño, polo que se establece a ordenación e o currículo de bacharelato na Comunidade Autónoma de Galicia, na súa disposición derradeira primeira autoriza a persoa titular da Consellería de Educación e Ordenación Universitaria para ditar as disposicións que sexan necesarias para a execución e desenvolvemento do establecido nel.
A Orde do 24 de xuño de 2008 pola que se desenvolve a organización e o currículo das ensinanzas de bacharelato na Comunidade Autónoma de Galicia, no seu artigo 7, determina os aspectos relacionados coa avaliación.
Detectada a omisión do procedemento para a concesión da mención de matrícula de honra, procede establecelo.
En consecuencia, a Consellería de Educación e Ordenación Universitaria
DISPÓN:
Artigo único.-Modificación da Orde do 24 de xuño de 2008.
Engádese un punto 14 ao artigo 7º, nos seguintes termos:
a) Os alumnos e as alumnas que obtiveran no segundo curso de bacharelato unha nota media igual ou superior a nove puntos poderán recibir a mención de matrícula de honra. A devandita mención concederáselle a un número de alumnos non superior ao 5% do total de alumnado deste curso.
b) A obtención da mención de matrícula de honra será consignada nos documentos de avaliación do alumno ou alumna.
c) A concreción curricular do bacharelato incluirá nas directrices xerais os criterios para a concesión das mencións de matrícula de honra ao alumnado.
Disposición derradeira
Entrada en vigor.-Esta orde entrará en vigor o día seguinte ao da súa publicación no Diario Oficial de Galicia.
Santiago de Compostela, 20 de abril de 2010.
Xesús Vázquez Abad
Conselleiro de Educación e Ordenación
Universitaria