A Lei 1/2010, do 11 de febreiro, de modificación de diversas leis de Galicia para a súa adaptación á Directiva 2006/123/CE do Parlamento Europeo e do Consello, do 12 de decembro de 2006, relativa aos servizos no mercado interior, supón o inicio do proceso de harmonización da normativa da Comunidade Autónoma de Galicia, eliminando os obstáculos que se opoñen á liberdade de establecemento e á circulación dos prestadores de servizos en Galicia.

Nesta liña, modificouse a Lei 14/2008, do 3 de decembro, de turismo de Galicia, coa supresión da necesidade de autorización previa ao inicio da actividade e a súa substitución por unha declaración responsable.

Así, o novo artigo 28.4º da citada Lei 14/2008 establece que, agás os campamentos de turismo, os demais provedores de servizos turísticos, incluídos no ámbito da lei, terán que presentar ante a consellería competente en materia de turismo unha declaración responsable de inicio de actividade, manifestando o cumprimento dos requisitos establecidos na normativa turística e o compromiso de mantelos durante o tempo de vixencia da actividade, relativos ao servizo ou establecemento e a súa clasificación turística, en que se fixará o grupo, categoría, modalidade e, se é o caso, especialidade que puidese corresponderlles, ademais da documentación exixida regulamentariamente para a prestación do servizo ou apertura do establecemento. A presentación da declaración responsable habilita para o desenvolvemento da actividade turística, sen prexuízo do cumprimento das demais obrigas exixidas noutras normas que lles resulten de aplicación. Así mesmo, o parágrafo 5 do citado artigo determina que cando

se produzan cambios no uso turístico ou na titularidade do establecemento terán que comunicarse á consellería competente en materia turística, no prazo de dez días desde que se produzan.

Por outro lado, o artigo 30.3º da citada lei establece que as empresas que cesen na súa actividade turística deberán notificarllo, no prazo de dez días, á Administración turística, e solicitar para o efecto a súa baixa.

O artigo 71.bis.5 da Lei 30/1992, do 26 de novembro, de réxime xurídico das administracións públicas e do procedemento administrativo común determina que as administracións públicas terán permanentemente publicados e actualizados modelos de declaración responsable e de comunicación previa.

Á vista do exposto, e en exercicio das atribucións conferidas polo artigo 34.6º da Lei 1/1983, do 22 de febreiro, de normas reguladoras da Xunta e da súa Presidencia,

DISPOÑO:

1. Aprobar e dar publicidade aos modelos oficiais de declaración responsable e solicitude de clasificación así como de comunicación previa relativos ás actividades de servizos turísticos, que se conteñen nos anexos I a IX desta orde, en virtude do establecido nos artigos 28 e 30 da Lei 14/2008, do 3 de decembro, de turismo de Galicia.

2. Esta orde entrará en vigor o día seguinte ao da súa publicación no Diario Oficial de Galicia.

Santiago de Compostela, 10 de maio de 2010.

Roberto Varela Fariña

Conselleiro de Cultura e Turismo

Ver referencia pdf "10700D007P057.PDF"