Mediante Resolución do 22 de xullo de 2010 publicouse o acordo do Consello de Dirección do Instituto Galego de Promoción Económica que aprobou as bases reguladoras das axudas do Instituto Galego de Promoción Económica (Igape) para o apoio financeiro aos sectores da hostalaría, comercio, turismo e servizos das comarcas de Ferrol, Eume e Ortegal (Re-invirte Ferrol) (DOG nº 142, do 27 de xullo de 2010), facultando o director xeral a súa convocatoria, aprobación dos créditos e publicación no Diario Oficial de Galicia.
Na súa virtude e de conformidade coas facultades que teño conferidas,
RESOLVO:
Primeiro. Convocar para o ano 2012, en réxime de concorrencia non competitiva, as axudas ao abeiro das bases reguladoras do Igape para o programa de apoio financeiro aos sectores da hostalaría, comercio, turismo e servizos das comarcas de Ferrol, Eume e Ortegal, instrumentadas mediante convenio de colaboración entre o Igape, as entidades financeiras adheridas e as sociedades de garantía recíproca (Re-invirte Ferrol) (DOG nº 142, do 27 de xullo de 2010).
O tipo de xuro nominal anual establecido no artigo 6.1. das bases reguladoras para as operacións acollidas a esta convocatoria do exercicio 2012 poderá ser, á elección do beneficiario, fixo ou variable:
Tipo de xuro fixo: será o que libremente pacten as partes, sen exceder os 6,75 puntos.
Tipo de xuro variable: o tipo de xuro nominal anual para as operacións de préstamo acollidas á presente convocatoria e o seu sistema de variación establécense do seguinte xeito:
a) Tipo de referencia: para o primeiro semestre de cada ano calcularase como a media aritmética simple dos tipos diarios do euríbor a prazo de 6 meses correspondentes ao mes de novembro do ano anterior. Para o segundo semestre será a media aritmética simple dos tipos diarios do euríbor a prazo de 6 meses correspondentes ao mes de maio do mesmo ano.
b) Tipo adicional: será o que libremente pacten as partes, sen exceder os 3,25 puntos.
c) O tipo de xuro nominal anual dos préstamos será, para cada semestre natural, o resultante de engadirlle ao tipo de referencia o tipo adicional que pacten as partes. Se o tipo de xuro resultase con varios decimais, arredondarase ata a más próxima vixésima parte do punto.
O tipo de xuro de referencia para cada semestre será comunicado polo Igape ás entidades financeiras e publicado no Diario Oficial de Galicia.
Así mesmo, para os efectos desta convocatoria, substitúese o anexo II, formulario de presentación da solicitude, e o anexo VI, relación de entidades financeiras e sociedades de garantía recíproca adheridas, segundo os modelos anexos.
Segundo. O prazo de presentación de solicitudes comezará o día seguinte ao da publicación desta resolución no Diario Oficial de Galicia e rematará o 14 de setembro de 2012 para as solicitudes na entidade financeira por parte do solicitante e o 15 de outubro de 2012 para a presentación das entidades financeiras no Igape.
No caso de esgotamento do crédito, en cumprimento do disposto no artigo 32 do Regulamento da Lei de subvencións de Galicia (Decreto 11/2009, do 8 de xaneiro), o Igape publicará a dita circunstancia no Diario Oficial de Galicia e na súa páxina web, co fin de pechar anticipadamente o prazo de presentación de solicitudes.
Terceiro. Os créditos dispoñibles para concesións nesta convocatoria aboaranse con cargo á seguinte aplicación orzamentaria e polos seguintes importes:
|
Partida orzamentaria |
2012 |
2013 |
|
08.A1.741A.7700 |
57.000,00 € |
43.000,00 € |
O director xeral do Igape poderá ampliar os créditos e modificar a partida orzamentaria, logo de declaración de dispoñibilidade dos créditos nos termos referidos no artigo 30.2 do Decreto 11/2009, mediante resolución publicada para o efecto.
Así mesmo, non se poderán outorgar subvencións por contía superior á que se determine nesta convocatoria salvo que se realice unha nova convocatoria, ou se produza un incremento de créditos derivados dunha xeración, ampliación ou incorporación de crédito; ou da existencia de remanentes doutras convocatorias financiadas con cargo ao mesmo crédito ou a créditos incluídos no mesmo programa ou en programas do mesmo servizo, ao abeiro do disposto no artigo 31.2 da Lei 9/2007, do 13 de xuño, de subvencións de Galicia, do cal se dará a correspondente publicidade no Diario Oficial de Galicia.
Cuarto. Os requisitos das letras c) (coa excepción indicada no punto primeiro desta resolución), e), f), h), i), k), l), m) e n) do artigo 20.2 da Lei 9/2007, do 13 de xuño, de subvencións de Galicia, indícanse nas bases reguladoras destas axudas aprobadas polo Consello de Dirección do Igape o 20 de abril de 2010 e publicadas no Diario Oficial de Galicia nº 142, do 27 de xullo.
Santiago de Compostela, 7 de xuño de 2012
Javier Aguilera Navarro
Director xeral do Instituto Galego de Promoción Económica
