De conformidade co disposto no artigo 59.4 da Lei 30/1992, do 26 de novembro, de réxime xurídico das administracións públicas e do procedemento administrativo común, notifícaselle, mediante a publicación no Diario Oficial de Galicia e exposición no taboleiro de edictos do concello de Poio, á mercantil Mariscos Patomar, S.L. orde de retirada da embarcación Sangre Azul con matrícula 4ª-VI-2-1-09 do peirao do porto de Combarro, por non ser posible a notificación a través do servizo de Correos no último enderezo coñecido sito na avenida Chancelas, 17, de Combarro, Poio, provincia de Pontevedra.

De acordo co expediente que traslada a Xefatura da Zona Sur de Portos de Galicia, que intentou notificar dúas ordes de retirada, a embarcación atracada no peirao do porto de Combarro leva moitos meses sen actividade ocupando un espazo que resulta necesario para outras embarcacións.

A presente orde emítea a Dirección de Portos de Galicia ao abeiro das competencias conferidas polo artigo 9.3.a) da Lei 5/1994, do 29 de novembro, de creación de Portos de Galicia.

A retirada da embarcación deberá producirse nun prazo máximo de 15 días contados desde o día seguinte ao da publicación da presente orde no Diario Oficial de Galicia e exposición no taboleiro de edictos do concello de Poio.

O atraso no cumprimento da orde de retirada implicará que Portos de Galicia comece a liquidar as tarifas X-1 –entrada e estadía de barcos, e X-2 - Atracada– conforme o establecido, respectivamente, nas regras décimo quinta e décimo primeira de aplicación a estas tarifas recollidas na Lei 6/2003, do 9 de decembro, de taxas, prezos e exaccións reguladoras da Comunidade Autónoma de Galicia, e todo iso sen prexuízo de reservar para si a potestade de efectuar a dita retirada de maneira subsidiaria e á custa do propietario da embarcación, e igualmente de iniciarse o procedemento para declarar o abandono da embarcación previsto no artigo 302 do Real decreto lexislativo 2/2011, do 5 de setembro, que aproba o texto refundido da Lei de portos do Estado e da mariña mercante, de aplicación supletoria, de persistir a situación actual.

O presente acto administrativo que ten eficacia executiva, non esgota a vía administrativa e é susceptible de recurso de alzada, que deberá presentarse ante a Presidencia de Portos de Galicia nun prazo máximo dun mes contado desde o día seguinte ao da súa publicación no Diario Oficial de Galicia ou ao da súa exposición no taboleiro de edictos do concello de Poio.

E para que conste e lles sirva de notificación, e en cumprimento do disposto no artigo 59.4 da Lei 30/1992, do 26 de novembro, de réxime xurídico das administracións públicas e do procedemento administrativo común, expido, asino e selo a presente cédula.

Santiago de Compostela, 3 de novembro de 2014

José Ignacio Villar García
Director de Portos de Galicia