O 17 de abril de 2007 publicouse no Diario Oficial de Galicia o Decreto 67/2007, do 22 de marzo, polo que se regula o Catálogo galego de arbores senlleiras. O tempo transcorrido desde a súa publicación pon de manifesto a necesidade de simplificar o procedemento administrativo previsto para a catalogación e descatalogación destas árbores, xa que logo, este procedemento conta cunha tramitación complexa que difire a súa resolución alén do desexable.
Neste mesmo sentido, a experiencia acumulada na tramitación destas solicitudes de catalogación aconsella modificar o réxime de protección preventiva a aplicar no momento de se formular unha solicitude de catalogación. Efectivamente, a aplicación inmediata e automática desta protección inicial supón de por si a paralización preventiva de calquera outro proxecto ou procedemento con que pode estar relacionado, feito que resulta especialmente gravoso en supostos en que a solicitude versa sobre árbores ou formacións que non reunirían de inicio característica ou valor ningún para desfrutar da dita protección preventiva nin, por tanto para a súa posterior catalogación.
Procédese a modificar o procedemento de catalogación e descatalogación no sentido de atribuír a instrución do procedemento ás xefaturas territoriais desta consellería, que logo da tramitación do procedemento remitirán a proposta de resolución á dirección xeral de conservación da Natureza para a súa resolución. Este procedemento vese alterado nos supostos de terse que adoptar medidas preventivas de protección da árbore ou formación obxecto da solicitude de catalogación, ou nos supostos de podas, tratamentos fitosanitarios e de risco inmediato para a seguridade das persoas, supostos en que, se residencia a competencia para a súa resolución nas persoas titulares das xefaturas territoriais, ao se requirir dunha actuación inmediata por parte da Administración. Igualmente incorpórase neste procedemento un trámite de información pública da solicitude de catalogación ou descatalogación, así como de publicidade das resolucións destes procedementos.
Finalmente, e co ánimo de facer mais áxil e dinámico todo este procedemento de catalogación, procede modificar, así mesmo, o funcionamento do Comité das Árbores Senlleiras, non só no relativo ás súas funcións senón tamén nas previsións referidas ás súas reunións, deixando que sexa o propio comité o que determine a periodicidade de convocatoria no seu propio regulamento de funcionamento.
Así mesmo, por razóns de seguridade xurídica, faise necesario actualizar os anexos I e II do Decreto 67/2007, do 22 de marzo, incorporando nun único documento os anexos iniciais publicados no citado decreto, e a súa actualización, publicada mediante a Orde
do 3 de outubro de 2011, pola que se actualiza o Catálogo galego de árbores senlleiras.
Na súa virtude, por proposta da conselleira de Medio Ambiente, Territorio e Infraestruturas, de acordo co Consello Consultivo e logo da deliberación do Consello da Xunta de Galicia na súa reunión do día vinte e dous de xaneiro de dous mil quince,
DISPOÑO:
Artigo único. Modificación do Decreto 67/2007, do 22 de marzo, polo que se regula o Catálogo galego de árbores senlleiras:
Primeiro. Dáse nova redacción ao artigo 4 do decreto 67/2007, do 22 de marzo, que queda redactado como segue:
«Artigo 4. Procedemento de catalogación e descatalogación.
1. O procedemento de catalogación ou descatalogación poderá ser iniciado de oficio pola consellería competente en materia de conservación da natureza ou por solicitude de persoa interesada.
2. Poderán instar o inicio do correspondente procedemento as persoas propietarias das árbores ou formacións, outras administracións públicas, centros de investigación ou asociacións e entidades privadas ou públicas que teñan entre os fins estatutarios a protección da natureza, mediante a presentación do modelo de solicitude de inclusión que figura no anexo III, acompañada da memoria xustificativa e de toda a información adicional da súa condición de senlleiro.
As solicitudes deberán presentarse preferiblemente por vía electrónica a través do formulario normalizado dispoñible na sede electrónica da Xunta de Galicia (https://sede.xunta.es) de acordo co establecido nos artigos 27 da Lei 11/2007, do 22 de xuño, de acceso dos cidadáns aos servizos públicos, e 24 do Decreto 198/2010, do 2 de decembro, polo que se regula o desenvolvemento da Administración electrónica na Xunta de Galicia e nas entidades dela dependentes. Para a presentación das solicitudes será necesario o documento nacional de identidade electrónico ou calquera dos certificados electrónicos recoñecidos pola sede electrónica da Xunta de Galicia.
Alternativamente, tamén se poderán presentar as solicitudes en soporte papel en calquera dos lugares e rexistros establecidos no artigo 38.4 da Lei 30/1992, do 26 de novembro, de réxime xurídico das administracións públicas e do procedemento administrativo común, utilizando o formulario normalizado dispoñible na sede electrónica da Xunta de Galicia.
As solicitudes dirixiranse ás xefaturas territoriais correspondentes desta consellería, en atención ao lugar en que se atopa a arbore ou formación obxecto desta solicitude.
Co obxectivo de manter adaptados á normativa vixente os formularios vinculados a normas reguladoras de procedementos administrativos de prazo aberto, estes poderán ser actualizados na sede electrónica da Xunta de Galicia, sen necesidade de publicalos novamente no DOG, sempre que a modificación ou actualización non supoña unha modificación substancial. Por conseguinte, para a presentación das solicitudes será necesario utilizar os formularios normalizados, dispoñibles na sede electrónica da Xunta de Galicia, onde estarán permanentemente actualizados e accesibles para as persoas interesadas.
A sede electrónica da Xunta de Galicia ten á disposición das persoas interesadas unha serie de modelos normalizados dos trámites máis comunmente utilizados na tramitación administrativa, que poderán ser presentados en calquera dos lugares e rexistros establecidos no artigo 38.4 da Lei 30/1992, do 26 de novembro, de réxime xurídico das administracións públicas e do procedemento administrativo común.
3. No caso de que a documentación presentada sexa insuficiente, a xefatura territorial requirirá ao interesado, conforme prevé o artigo 71 da Lei 30/1992, do 26 de novembro, que nun prazo de dez días emende a falta ou presente os documentos preceptivos, coa indicación de que, se así non o fixase, se teña por desistido da súa solicitude, logo da resolución ditada en tal sentido.
4. A solicitude e a documentación presentada someteranse ao trámite de información pública por un prazo de vinte días, para os efectos de que os interesados poidan presentar os documentos e xustificacións que consideren pertinentes. Igualmente, e previamente á proposta de resolución de catalogación, darase audiencia ás persoas propietarias dos exemplares ou formacións ou aos seus representantes.
5. Logo da valoración das alegacións, a persoa titular do órgano territorial de dirección competente en materia de conservación da natureza correspondente en función do lugar onde se localicen os exemplares formulará unha proposta de resolución que remitirá á Dirección Xeral de Conservación da Natureza para a súa resolución.
Esta resolución, que deberá ditarse e notificarse no prazo máximo de cinco meses segundo o establecido no artigo 42.2 da Lei 30/1992, do 26 de novembro, contado a partir da data do acordo de inicio ou da data en que se formulou a correspondente solicitude, non poñerá fin á vía administrativa e será susceptible de recurso de alzada ante a consellería de Medio Ambiente, Territorio e Infraestruturas no prazo dun mes desde a súa notificación.
6. Transcorrido o prazo de cinco meses referido no número anterior sen que a Administración teña resolto expresamente o procedemento, entenderase estimada a dita solicitude de catalogación ou descatalogación, de conformidade co artigo 43 da Lei 30/1992, do 26 de novembro; de tratarse dun procedemento iniciado de oficio pola Administración, observase o disposto no artigo 44 da dita lei.
7. A descatalogación producirase como consecuencia da morte biolóxica ou da perda dos valores que motivaron a súa inclusión.
8. As resolucións de catalogación ou descatalogación serán obxecto de publicación no Diario Oficial de Galicia».
Segundo. Engádese un artigo 4.bis co seguinte teor:
«Artigo 4 bis. Efectos da iniciación do procedemento
A iniciación do procedemento de catalogación dun exemplar ou formación singular só levará unida a aplicación inmediata e provisional das medidas de protección establecidas neste decreto cando así o acorde a Dirección Xeral de Conservación da Natureza por proposta da xefatura territorial correspondente, mediante resolución motivada, logo de ponderación dos valores ambientais protexibles da árbore ou da formación obxecto da solicitude.
No suposto de procedementos iniciados de oficio, a Dirección Xeral de Conservación da Natureza adoptará mediante resolución motivada e cun carácter inmediato as medidas de protección que foren necesarias».
Terceiro. Engádese ao artigo 5 do Decreto 67/2007, do 22 de marzo, o seguinte punto:
«4. Nos nomeamentos das persoas integrantes do Comité das Árbores Senlleiras procurarase acadar unha presenza equilibrada de homes e mulleres».
Cuarto. Dáse nova redacción ao artigo 6 do Decreto 67/2007, do 22 de marzo, que queda redactado como segue:
«Artigo 6. Funcións do Comité das Árbores Senlleiras
O Comité das Árbores Senlleiras terá, particularmente, as seguintes funcións:
a) Propor os criterios de inclusión no catálogo, atendendo aos indicadores relacionados cos méritos recollidos no artigo 2.
b) Propor a catalogación ou descatalogación das árbores e formacións singulares, con base na información debidamente documentada.
c) Emitir informe sobre as solicitudes de catalogación presentadas, naqueles supostos en que así o considere oportuno a xefatura territorial correspondente. Estes informes serán facultativos e non vinculantes, e serán emitidos polo Comité das Arbores Senlleiras no prazo máximo de quince días desde a súa solicitude.
d) Informar os diferentes plans de xestión que se elaboren para cada un dos exemplares e formacións catalogadas.
e) Aconsellar sobre as medidas de conservación e informar dos diferentes tratamentos fitosanitarios que se leven a cabo».
Quinto. Dáse nova redacción ao artigo 7 do Decreto 67/2007, do 22 de marzo, que queda redactado como segue:
«Artigo 7. Funcionamento do Comité das Árbores Senlleiras
1. O réxime de funcionamento do Comité das Arbores Senlleiras axustarase ao previsto no capítulo II do título II da Lei 30/1992, do 26 de novembro, e élle de aplicación o previsto na sección 3ª, capítulo I, do título I da Lei 16/2010, do 17 de decembro, de organización e funcionamento da Administración xeral e do sector público autonómico de Galicia.
2. Corresponde á persoa que teña a súa presidencia acordar a convocatoria das sesións, conforme o artigo 16 da Lei 16/2010, do 17 de decembro, e o réxime de convocatorias que sexa establecido polo Comité no seu propio regulamento de funcionamento».
Sexto. Dáse nova redacción ao artigo 9 do Decreto 67/2007, do 22 de marzo, que queda redactado como segue:
«Artigo 9. Protección
1. As árbores e formacións senlleiras que se inclúan no catálogo considéranse protexidas para todos os efectos.
2. A protección implica a prohibición de calquera acción que poida afectar negativamente a súa integridade, a súa saúde e a súa aparencia. No caso de formacións naturais, esta protección entenderase aplicable tamén a todo o seu cortexo florístico.
3. Os proxectos cuxa execución poida ameazar os valores naturais, culturais, científicos, didácticos ou doutra orde, de árbores ou formacións singulares necesitarán autorización administrativa previa da Dirección Xeral de Conservación da Natureza.
4. A realización de actuacións como podas ou tratamentos fitosanitarios, cando sexan necesarias para a conservación do propio exemplar só precisarán da comunicación previa á xefatura territorial, para o suposto de terse aprobado o correspondente plan de xestión. No caso contrario, estarán sometidas á autorización administrativa da xefatura territorial, que deberá outorgala no prazo máximo de tres meses, entendéndose outorgada de non se ter ditado resolución expresa no dito prazo, de acordo cos artigos 42 e 43 da Lei 30/1992, do 26 de novembro
No suposto de existir un perigo ou risco inmediato para a seguridade das persoas, así como nos supostos de especial gravidade no ámbito da sanidade vexetal, solicitarase autorización previa á correspondente xefatura territorial da consellería competente en materia de conservación da natureza para poder realizar as actuacións de poda, tratamento fitosanitario e mesmo da eliminación da árbore ou formación, autorización que queda sometida á previa comprobación e acreditación desta situación polo servizo de conservación da natureza da xefatura territorial correspondente. De non se resolver a dita solicitude no prazo de 15 días, entenderase estimada a solicitude de autorización, de acordo co previsto no artigo 43 da Lei 30/1992, do 26 de novembro».
Disposición transitoria única
As solicitudes de catalogación formuladas con anterioridade á data de entrada en vigor do presente decreto tramitaranse polo procedemento vixente no momento de se formular a solicitude.
Disposición adicional primeira
Os anexos I e II do Decreto 67/2007, do 22 de marzo, substitúense polos anexos I e II deste decreto.
Disposición adicional segunda
De conformidade coa Lei orgánica 15/1999, do 13 decembro, de protección de datos de carácter persoal, os datos persoais recollidos na tramitación desta disposición, cuxo tratamento e publicación autorizan as persoas interesadas mediante a presentación das solicitudes, serán incluídos nun ficheiro denominado «Relacións administrativas coa cidadanía e entidades», cuxo obxecto é xestionar o presente procedemento, así como para informar as persoas interesadas sobre o seu desenvolvemento. O órgano responsable deste ficheiro é a Secretaría Xeral Técnica da Consellería de Medio Ambiente, Territorio e Infraestruturas. Os dereitos de acceso, rectificación, cancelación e oposición poderanse exercer ante a Secretaría Xeral Técnica da Consellería de Medio Ambiente, Territorio e Infraestruturas, mediante o envío dunha comunicación ao seguinte enderezo: Consellería de Medio Ambiente, Territorio e Infraestruturas, Secretaría Xeral Técnica, Edificio Administrativo de San Caetano, San Caetano, s/n, 15781 Santiago de Compostela (A Coruña) ou a través dun correo electrónico a sx.cmati@xunta.es.
Disposición derrogatoria única
Quedan derrogadas cantas disposicións de igual ou inferior rango se opoñan ao disposto neste decreto, en concreto a Orde do 3 de outubro de 2011, pola que se actualiza o Catálogo galego de árbores senlleiras.
Disposición derradeira
Este decreto entrará en vigor aos vinte días da súa publicación no Diario Oficial de Galicia.
Santiago de Compostela, vinte e dous de xaneiro de dous mil quince
Alberto Núñez Feijóo
Presidente
Ethel María Vázquez Mourelle
Conselleira de Medio Ambiente, Territorio e Infraestruturas