Para a consecución da eficacia na prestación dos servizos sanitarios no ámbito do Servizo Galego de Saúde, e da eficiencia na utilización dos recursos económicos de que dispón, resulta necesario que este organismo se dote dos instrumentos básicos que permitan a planificación eficiente dos seus recursos humanos, a súa axeitada dimensión e a mellor distribución en función das necesidades.

Nesta liña, o artigo 69 da Lei 7/2007, do 12 de abril, do Estatuto básico do empregado público, establece que a planificación dos recursos humanos nas administracións públicas terá como obxectivo contribuír á consecución da eficacia na prestación dos servizos e da eficiencia na utilización dos recursos económicos dispoñibles, mediante, entre outras, a dimensión adecuada dos seus efectivos, a súa mellor distribución e mobilidade.

No mesmo sentido, o artigo 13 da Lei 55/2003, do 16 de decembro, do Estatuto marco do persoal estatutario dos servizos de saúde, establece que os plans de ordenación de recursos humanos constitúen o instrumento básico de planificación global destes dentro do servizo de saúde ou no ámbito que neles se precise.

O artigo 12 do mesmo texto legal dispón que esa planificación estará orientada ao seu adecuado dimensionamento, distribución, estabilidade, desenvolvemento, formación e capacitación, co fin de mellorar a calidade, eficacia e eficiencia dos servizos. Polo que, no ámbito de cada servizo de saúde e logo de negociación nas mesas correspondentes, determina que se adopten as medidas necesarias para a planificación eficiente das necesidades de persoal, entre outros aspectos.

Así mesmo, a Lei 8/2008, do 10 de xullo, de saúde de Galicia, permite consonte o seu artigo 112.3 a elaboración de plans parciais para materias concretas de persoal.

En consecuencia, en virtude das facultades conferidas polo artigo 112 da Lei 8/2008, do 10 de xullo, o artigo 34.6 da Lei 1/1986, do 22 de febreiro, de normas reguladoras da Xunta e da súa Presidencia, e logo da súa negociación na mesa sectorial de sanidade, en cumprimento do disposto no artigo 80.2.g) da Lei 55/2003, do 16 de decembro,

DISPOÑO:

Primeiro. Aprobar o Plan de ordenación de recursos humanos de determinados servizos non clínicos da Estrutura Organizativa de Xestión Integrada de Vigo, que se recolle como anexo á orde.

Segundo. Dispoñer a súa publicación no Diario Oficial de Galicia.

Disposición derradeira única. Habilitación para a execución do plan

Facúltase a Dirección Xeral de Recursos Humanos do Servizo Galego de Saúde, así como a Xerencia de Xestión Integrada de Vigo para ditar, no ámbito das súas respectivas competencias, cantos actos sexan necesarios para a execución do plan que figura como anexo á orde.

Santiago de Compostela, 23 de xullo de 2015

Rocío Mosquera Álvarez
Conselleira de Sanidade

ANEXO
Plan de ordenación de recursos humanos de determinados servizos non clínicos da Estrutura Organizativa de Xestión Integrada de Vigo

Para a consecución da eficacia na prestación da asistencia sanitaria no ámbito do Servizo Galego de Saúde, e da eficiencia na utilización de recursos económicos de que dispón, resulta necesario que o organismo se dote dos instrumentos básicos que permitan a planificación eficiente das necesidades de recursos humanos, a súa axeitada dimensión e a mellor distribución en función das necesidades asistenciais.

Nesta liña, o artigo 13 da Lei 55/2003, do 16 de decembro, pola que se aproba o Estatuto marco do persoal estatutario dos servizos de saúde, establece que os plans de ordenación de recursos humanos constitúen o instrumento básico de planificación global destes dentro do servizo de saúde ou no ámbito que neles se precise.

O artigo 12 do mesmo texto legal dispón que esa planificación estará orientada ao seu adecuado dimensionamento, distribución, estabilidade, desenvolvemento, formación e capacitación, co fin de mellorar a calidade, eficacia e eficiencia dos servizos. Polo que, no ámbito de cada servizo de saúde e logo de negociación nas mesas correspondentes, determina que se adopten as medidas necesarias para a planificación eficiente das necesidades de persoal, entre outros aspectos.

A importancia deste tipo de instrumentos de planificación global resulta notoria, na medida en que responden ao principio de eficacia que debe presidir a actuación das administracións públicas.

Como consecuencia da apertura do novo hospital de Vigo, determinados servizos non clínicos que ata o momento viña xestionando a Estrutura Organizativa de Xestión Integrada (EOXI) de Vigo, pasarán a desempeñarse baixo a organización e supervisión da sociedade concesionaria do novo hospital.

Estes servizos concrétanse nos de restauración, lavandaría e lenzaría, limpeza, mantemento xeral e transporte interno e externo, a nivel de toda a EOXI de Vigo, salvo o servizo de mantemento xeral que se mantén como servizo propio da EOXI no Hospital do Meixoeiro.

A situación descrita obriga a levar a cabo unha reordenación das condicións de prestación de servizos do persoal estatutario de xestión e servizos adscrito ás unidades mencionadas, así como a concretar as categorías e vínculos afectados, tratando de conciliar as necesidades organizativas da Administración coa voluntariedade dos profesionais.

No dito senso, o 4 de decembro de 2014 publicouse no Diario Oficial de Galicia (núm. 233, do 4 de decembro) a Resolución do 28 de novembro de 2014, da Xerencia da Estrutura Organizativa de Xestión Integrada de Vigo, pola que se oferta aos empregados públicos de determinadas categorías de servizos non clínicos da dita estrutura organizativa, a opción de pasaren a prestar servizos, de forma voluntaria, como persoal laboral na entidade concesionaria da explotación dos devanditos ditos servizos.

Deste xeito e a través da citada resolución, estableceuse o procedemento e as posibles alternativas dos profesionais destinatarios daquela no que atinxe á súa prestación de servizos, ben a de manter o seu actual vínculo co Servizo Galego de Saúde na EOXI de Vigo, ben a de incorporarse ao cadro de persoal da entidade concesionaria baixo o réxime xurídico laboral; dando soporte deste modo ás previsións contidas ao respecto no prego de cláusulas administrativas particulares do contrato de concesión e explotación de determinados servizos non clínicos do novo hospital de Vigo.

Na liña apuntada e no marco da voluntariedade dos/as profesionais, resulta necesario regular unha serie de medidas que, malia que partindo das previsións contidas na antedita resolución, transcenden tanto das competencias da EOXI de Vigo como da potestade negociadora residenciada nos órganos de representación da área sanitaria, por resultaren propias, de conformidade coa lexislación vixente, dun plan de ordenación de recursos humanos. Medidas entre as cales cabe destacar as relativas á reclasificación do persoal, incorporada a este plan, entre outras materias.

Este plan toma a súa fundamentación no capítulo III da Lei 55/2003, do 16 de setembro, do Estatuto marco do persoal estatutario dos servizos de saúde, no título VIII da Lei 8/2008, do 10 de xullo, de saúde de Galicia, e no capítulo X do Decreto 206/2005, do 22 de xullo, de provisión de prazas de persoal estatutario do Servizo Galego de Saúde.

Tendo en conta o que antecede, o contido do plan articúlase nos seguintes puntos:

Primeiro. Obxecto e ámbito de aplicación

1. Este plan de ordenación ten por obxecto constituír o instrumento básico de planificación do persoal estatutario de xestión e servizos dependente da EOXI de Vigo que se encontre adscrito ás unidades funcionais e servizos non clínicos cuxa xestión asumirá a entidade concesionaria do novo hospital de Vigo, definido e nos termos dos ordinais terceiro e cuarto, e que non exercese a opción de incorporación á devandita sociedade.

2. O plan recolle así mesmo, unha serie de previsións específicas en relación coa concreta opción exercida.

Segundo. Obxectivos

O plan ten como obxectivos:

a) Adaptar os postos de traballo da EOXI de Vigo á nova realidade de non precisar de servizos de restauración, lavandaría e lenzaría e limpeza propios no novo hospital de Vigo; sen prexuízo das medidas de reasignación de postos de traballo que poida adoptar a EOXI, consonte as súas potestades de autoorganización, respecto do persoal dos actuais servizos de mantemento e transporte.

b) Reclasificar o persoal fixo afectado nos casos en que proceda, garantíndolle unha praza no cadro de persoal da EOXI de Vigo na categoría que corresponda conforme o disposto no ordinal oitavo deste plan de ordenación.

c) Adoptar unha serie de medidas co fin de dar cumprimento ás necesidades organizativas da Administración sanitaria, tratando de facilitar, na medida do posible e de xeito compatible co propio plan e coa normativa de vixente aplicación, a conciliación da vida laboral e persoal dos destinatarios, así como dos aspirantes a vinculacións temporais inscritos nas listas de selección temporal na área sanitaria de Vigo, nas categorías relacionadas con este plan.

Terceiro. Servizos incluídos no ámbito de aplicación

1. Os servizos que, de acordo co prego de cláusulas administrativas particulares que rexeu a licitación, quedarán afectados pola concesión e polo presente plan, son os seguintes:

a) Restauración.

b) Lavandaría e lenzaría.

c) Limpeza.

d) Mantemento xeral.

e) Transporte interno/externo.

f) Conservación de vías e xardíns do novo hospital de Vigo.

2. No entanto, a inclusión na anterior relación do servizo de mantemento xeral refírese ao que se desenvolverá no novo hospital de Vigo, sen que resulte afectado o propio do Hospital do Meixoeiro e outros centros da EOXI de Vigo.

Do mesmo xeito, o servizo de transporte interno/externo que se menciona é o relativo ao Complexo Hospitalario de Vigo, sen que resulte tampouco afectado o propio das restantes dependencias e centros da EOXI de Vigo.

Cuarto. Persoal incluído no ámbito de aplicación

1. O persoal incluído no ámbito de aplicación deste plan é o persoal estatutario de xestión e servizos que desenvolva as súas funcións nalgún dos servizos ou unidades sinaladas no número 1 do punto anterior, pertencente ás seguintes categorías:

a) Cociñeiro/a.

b) Pinche.

c) Gobernante/a.

d) Lavandeiro/a.

e) Pasador/a de ferro.

f) Costureiro/a.

g) Limpador/a.

2. Pola súa vez, o persoal estatutario fixo de xestión e servizos que se encontre destinado nos servizos de mantemento xeral, de transporte interno/externo e de conservación de vías e xardíns mencionados no ordinal terceiro (actuais servizos de mantemento e transporte do Hospital Xeral-Cíes), malia estar afectado pola concesión, será recolocado noutros servizos e unidades da EOXI de Vigo.

Para estes efectos, o devandito persoal é destinatario da oferta para pasar a prestar servizos como persoal laboral na entidade concesionaria, formalizada pola Resolución do 28 de novembro de 2014, da Xerencia de Xestión Integrada de Vigo. De tal xeito que, de conformidade con esta e respecto a aqueles/as profesionais que optasen por non incorporarse á sociedade concesionaria, continuarán coa súa actual vinculación á EOXI de Vigo, e procederase asemade á súa recolocación noutros servizos e unidades dentro da EOXI na súa actual categoría, de acordo coas potestades de autoorganización da propia EOXI.

Quinto. Persoal non incluído no ámbito de aplicación

1. O persoal estatutario de xestión e servizos que se encontre destinado nalgúns dos servizos mencionados no ordinal terceiro, pero non pertenza a ningunha das categorías sinaladas no ordinal cuarto, non se verá afectado pola concesión nin, xa que logo, polo presente plan, xa que será recolocado noutros servizos e unidades da EOXI de Vigo.

2. O persoal a que se refire este punto é o pertencente ás seguintes categorías:

a) Grupo de xestión da función administrativa.

b) Grupo administrativo da función administrativa.

c) Grupo auxiliar da función administrativa.

d) Celador/a.

Sexto. Medidas de adaptación dos postos de traballo

1. Na actualidade a EOXI de Vigo dispón, nos servizos e unidades que se especifican consonte os ordinais terceiro e cuarto, dos seguintes efectivos:

a) 14 cociñeiros/as.

b) 113 pinches.

c) Cinco gobernantes/as.

d) 18 lavandeiros/as.

e) 43 pasadores/as de ferro.

f) Sete costureiros/as.

g) Cinco limpadores/as.

2. Unha vez que entre en funcionamento o novo hospital de Vigo e, xa que logo, a entidade concesionaria inicie a explotación e xestión dos servizos non clínicos especificados e incluídos no ámbito de aplicación deste plan, as prazas mencionadas serán amortizadas no cadro de persoal da EOXI de Vigo. Simultaneamente, para o caso do persoal estatutario fixo, como medida específica de reclasificación crearanse as correspondentes prazas das categorías estatutarias que se sinalan no ordinal oitavo.

3. Polo que respecta ao persoal estatutario temporal con nomeamento interino ou con nomeamento de servizos determinados ata a apertura do novo hospital de Vigo, que desempeñe as súas funcións nos servizos non clínicos especificados no ordinal terceiro deste plan e que non optase pola súa incorporación voluntaria na sociedade concesionaria, cesará na súa vinculación temporal, por amortización da praza desempeñada ou polo cumprimento do prazo ou motivo previsto para o seu vencemento, nos termos do seu respectivo nomeamento e de conformidade co establecido no artigo 9 da Lei 55/2003, do 16 de decembro.

4. Con base nas necesidades de recursos humanos e da organización funcional dos centros da EOXI de Vigo, esta deberá elaborar, no prazo dun mes desde a entrada en vigor do presente plan, un documento de planificación funcional para os efectos de determinar, de ser o caso, os novos vínculos ou prazas estruturais das categorías que se consideren necesarias por mor do apertura do novo hospital de Vigo.

Sétimo. Previsións específicas relativas á opción do persoal incluído no ámbito de aplicación

Como complemento do disposto na Resolución do 28 de novembro de 2014, da Xerencia da Estrutura Organizativa de Xestión Integrada de Vigo procede establecer unha serie de medidas específicas en relación coa opción que puido exercer o persoal afectado por esta, diferenciadas do seguinte xeito:

1. Persoal estatutario fixo:

a) Incorporación á sociedade concesionaria do novo hospital de Vigo como persoal laboral desta.

Con carácter xeral, o persoal estatutario fixo incluído no ámbito de aplicación deste plan e da oferta contida na Resolución do 28 de novembro de 2014 da Xerencia de Xestión Integrada de Vigo puido optar por pasar a prestar servizos na sociedade concesionaria do novo hospital de Vigo como persoal laboral dela.

Neste caso, a dita resolución prevé que o persoal que exerza esta opción pasará á situación administrativa de servizos baixo outro réxime xurídico recollida no artigo 65 da Lei 55/2003, do 16 de setembro, indicándose, entre outros efectos, que o persoal nesta situación terá dereito á reincorporación durante os tres primeiros anos ao servizo activo na mesma categoría e área de saúde de orixe, ou, se non for posible, en áreas limítrofes con aquela. Tamén pode reincorporarse a unha praza na EOXI de Vigo na categoría reclasificada que lle corresponda, a cal deberá concretarse nun plan de ordenación de recursos humanos.

A ese respecto, e mediante este plan de ordenación, concrétase arestora que a categoría reclasificada en cuxa praza pode exercerse o dereito á devandita reincorporación, dentro da EOXI de Vigo, é a establecida no ordinal oitavo.

Sen prexuízo do anterior, como medida específica deste plan de ordenación e de conformidade coas competencias de desenvolvemento lexislativo e de execución en materia de réxime estatutario dos funcionarios públicos que lle corresponden á Comunidade Autónoma de Galicia e ao abeiro asemade do previsto no artigo 62 da Lei 55/2003, do 16 de decembro, amplíase o dereito á reincorporación ao servizo activo na mesma categoría e área de orixe (ou, de non existiren prazas vacantes nela, noutras áreas sanitarias) ata o cumprimento da idade de xubilación forzosa do persoal incluído no ámbito de aplicación deste plan que sexa declarado na situación de servizos baixo outro réxime xurídico.

b) Mantemento da condición de persoal estatutario coa reclasificación da categoría correspondente.

O persoal que non exercese a anterior opción, ao abeiro da Resolución do 28 de novembro de 2014, manterá o seu vínculo estatutario co Servizo Galego de Saúde e o destino na EOXI de Vigo, garantíndose os dereitos inherentes a tal condición, ben que a súa categoría orixinaria será reclasificada na categoría profesional que corresponda consonte o disposto no ordinal oitavo, coa data de efectos que deberá ser previamente comunicada pola Dirección da EOXI de Vigo, pasando a partir dese momento a desempeñar as funcións correspondentes á nova categoría.

Para tal efecto, garántese que a EOXI de Vigo lle proporcionará a este persoal canta formación teórica e práctica sexa adecuada para o axeitado desenvolvemento das novas funcións.

c) Adscrición a outra praza do Servizo Galego de Saúde na mesma categoría e condicións en que se encontraba con anterioridade.

Neste caso, a persoa interesada deberá formular ante a Dirección Xeral de Recursos Humanos do organismo unha solicitude indicando o centro (EOXI) ou centros que desexe. De non existir no momento da solicitude prazas vacantes no centro indicado, o Servizo Galego de Saúde habilitará os recursos necesarios para garantir a devandita adscrición, de conformidade cos sistemas de provisión previstos na normativa vixente.

2. Persoal estatutario temporal con nomeamento interino ou de servizos determinados na EOXI de Vigo nos servizos afectados:

a) Incorporación á sociedade concesionaria do novo hospital de Vigo como persoal laboral desta.

O persoal estatutario temporal pertencente a calquera dos servizos que se indican no ordinal terceiro que estea a desempeñar un nomeamento interino en praza vacante ou un nomeamento de servizos determinados ata a apertura do novo hospital de Vigo, puido exercer, de forma voluntaria, a opción de incorporarse como persoal laboral á sociedade concesionaria do novo hospital de Vigo, a quen corresponde, como adxudicataria do contrato de concesión, a explotación de determinados servizos non clínicos do complexo hospitalario (CHUVI).

Neste caso, o/a profesional integrarase para todos os efectos no cadro de persoal da entidade concesionaria e manterá, cando menos, a súa categoría profesional, antigüidade e condicións económicas vixentes no momento da opción. O citado persoal dependerá exclusivamente da entidade concesionaria, polo que esta terá todos os dereitos e deberes inherentes á súa calidade de empresario.

b) En caso contrario, producirase o seu cesamento nos termos sinalados no punto 3 do ordinal sexto.

3. Persoal temporal con nomeamento de substitución na EOXI de Vigo nas categorías obxecto de reclasificación:

O persoal estatutario temporal que estea a desempeñar un nomeamento de substitución dun/dunha titular pertencente a algunha das categorías profesionais sinaladas no punto 1 do ordinal cuarto, que non optase pola incorporación á sociedade concesionaria (procedendo en consecuencia a súa reclasificación), estará vinculado á opción exercida polo/a titular ao cal substitúe.

Oitavo. Medidas de reclasificación profesional

1. O persoal estatutario fixo comprendido no punto 1 do ordinal cuarto que, acolléndose ao disposto na Resolución do 28 de novembro de 2014, da Xerencia da Estrutura Organizativa de Xestión Integrada de Vigo, non exercese a opción voluntaria de pasar a prestar servizos como persoal laboral na entidade concesionaria, continuará coa súa vinculación á EOXI de Vigo baixo o réxime xurídico estatutario. Neste caso, na data de efectos que deberá ser previamente comunicada pola Dirección da EOXI de Vigo, mudará a súa categoría de orixe, dentro do mesmo subgrupo de clasificación, consonte o seguinte cadro:

Categoría orixinaria	Categoría de reclasificación
Cociñeiro/a	Grupo administrativo da función administrativa
Gobernante/a	Grupo auxiliar da función administrativa
Costureiro/a	Grupo auxiliar da función administrativa
Lavandeiro/a	Celador/a
Limpador/a	Celador/a
Pinche	Celador/a
Pasador/a de ferro	Celador/a

2. Ao persoal incluído neste punto que percibise con anterioridade retribucións superiores ás correspondentes á categoría de reclasificación, recoñeceráselle un complemento persoal, transitorio e absorbible consistente na diferenza das retribucións, fixas na súa contía e periódicas na súa devindicación, coa categoría e o posto de traballo orixinarios.

De conformidade coa normativa orzamentaria, o citado complemento será absorbido por calquera mellora retributiva que se produza neste exercicio ou posteriores, incluídas as derivadas de cambio de posto de traballo ou categoría. No caso de que o cambio de posto ou categoría determine unha diminución das retribucións, manterase o complemento persoal e transitorio inicialmente fixado no momento da reclasificación, á absorción do cal se lle imputará calquera mellora retributiva ulterior, mesmo a que poida derivar de novo cambio de posto de traballo ou categoría.

Noveno. Medidas transitorias en materia de selección do persoal temporal afectado

1. De conformidade co previsto na norma xeral II.4.6.2 da Resolución conxunta do 26 de abril de 2011, da Secretaría Xeral Técnica da Consellería de Sanidade e da Xerencia do Servizo Galego de Saúde, pola que se dispón a publicación do pacto sobre selección de persoal estatutario temporal no ámbito do Servizo Galego de Saúde e entidades públicas adscritas á Consellería de Sanidade (DOG núm. 89, do 9 de maio), o persoal estatutario temporal dos servizos afectados pertencente a categorías que fosen obxecto de reclasificación nos termos do ordinal sétimo, poderá formar parte das listas de selección temporal da categoría en que aquelas se reclasifiquen, correspondentes á área de Vigo. A incorporación nas ditas listas terá lugar de xeito automático, sen necesidade de esperar á formalización dunha nova xeración das listaxes das devanditas categorías.

2. No suposto anterior e para os efectos da valoración dos méritos, os servizos prestados na categoría profesional de orixe serán computados na categoría de reclasificación.

3. Pola súa vez, o persoal estatutario temporal dos servizos afectados que formaba parte das listaxes das categorías orixinarias de cociñeiro/a, gobernante/a, costureiro/a, lavandeiro/a, limpador/a, pinche ou pasador/a do ferro da área sanitaria de Vigo poderá compatibilizar, se así o desexa, a súa inscrición nas listaxes das categorías de reclasificación correspondentes á devandita área, coa inscrición nas listaxes de selección temporal de cociñeiro/a, gobernante/a, costureiro/a, lavandeiro/a, limpador/a, pinche ou pasador/a do ferro das áreas limítrofes.

4. As anteriores medidas faranse efectivas logo do seu tratamento na comisión central de seguimento do pacto.

Décimo. Incidencia do concurso de traslados en tramitación

1. O persoal estatutario fixo incluído no ámbito de aplicación deste plan que na data da súa entrada en vigor estea participando e non excluído no proceso iniciado ao abeiro da Resolución do 19 de novembro de 2014, da Dirección Xeral de Recursos Humanos, pola que se convoca concurso de traslados para a provisión de diversas prazas básicas de persoal estatutario de xestión e servizos (DOG núm. 231, do 2 de decembro) deste organismo, non será obxecto de reclasificación, de ser o caso, mentres non conclúa o citado concurso de traslados.

2. Unha vez rematado o proceso, no caso de non obter ningún dos destinos solicitados, será reclasificado na categoría profesional correspondente de acordo co ordinal oitavo deste plan.

Décimo primeiro. Vixencia

Este plan entrará en vigor o día seguinte ao da súa publicación no Diario Oficial de Galicia.