A Orde do 30 de decembro de 2014 pola que se establecen as bases polas cales se rexerá a concesión da prestación económica de pagamento único por fillas e fillos menores de tres anos para o ano 2015, establece na súa exposición de motivos que o financiamento destas axudas se efectuará con cargo aos orzamentos xerais da Comunidade Autónoma de Galicia para o ano 2015, a través dos créditos consignados na aplicación 11.05.312B.480.0, polo importe global de 1.800.000 euros, incrementada en 140.000 euros pola Orde do 31 de agosto de 2015 pola que se modifica a Orde do 30 de decembro de 2014 pola que se establecen as bases polas que se rexerá a concesión da prestación económica de pagamento único por fillas e fillos menores de tres anos para o ano 2015.
Tendo en conta o volume de solicitudes recibidas e tratando de dar resposta á ampla demanda da axuda, deben artellarse as medidas necesarias para garantir o dereito das persoas solicitantes e que cumpren os requisitos determinados na Orde do 30 de decembro a poderen recibir as axudas que lles corresponden, polo que parece oportuno incrementar o importe destinado á dotación orzamentaria consignada nas respectivas ordes para a concesión das ditas prestacións económicas.
Por todo o exposto e no uso das facultades que me foron conferidas,
RESOLVO:
Artigo único. Incremento dos créditos
Increméntase o importe total dos créditos para o financiamento das axudas previstas na Orde do 30 de decembro de 2014 pola que se establecen as bases polas que se rexerá a concesión da prestación económica de pagamento único por fillas e fillos menores de tres anos para o ano 2015, modificada pola Orde do 31 de agosto de 2015, en 1.020.000 euros, na aplicación orzamentaria 11.05.312B.480.0.
Disposición derradeira única. Entrada en vigor
Esta orde entrará en vigor o día seguinte ao da súa publicación no Diario Oficial de Galicia.
Santiago de Compostela, 25 de novembro de 2015
José Manuel Rey Varela
Conselleiro de Política Social