Conforme o disposto no artigo 70 do Real decreto lexislativo 5/2015, do 30 de outubro, polo que se aproba o texto refundido da Lei do Estatuto básico do empregado público; no artigo 21 da Lei 36/2014, do 26 de decembro, de orzamentos xerais do Estado para o ano 2015; nos artigos 13 e 36 da Lei 11/2014, do 19 de decembro, de orzamentos xerais da Comunidade Autónoma de Galicia para o ano 2015, así como nos Estatutos da Universidade de Santiago de Compostela e no Acordo do Consello de Goberno do 4 de novembro de 2015 polo que se aprobou a oferta de emprego público do persoal de administración e servizos, logo da negociación cos órganos de representación do persoal de administración e servizos,

RESOLVO:

Primeiro. Publicar a oferta de emprego público do persoal de administración e servizos da USC para o ano 2015.

Segundo. Esta oferta de emprego inclúe as necesidades de recursos humanos con asignación orzamentaria que non poden ser cubertas cos efectivos de persoal existentes, segundo se detalla no anexo, todo dentro do contexto global de restrición orzamentaria que afecta as administracións públicas.

Terceiro. A planificación dos recursos humanos na USC oriéntase á atención das unidades prioritarias, á correcta dimensión do volume de efectivos, á mellora na distribución e capacitación dos efectivos para unha prestación máis eficaz dos servizos e a potenciar a estabilidade no emprego.

Cuarto. Mediante Resolución do 20 de novembro de 2015, a Dirección Xeral de Planificación e Orzamentos autorizou esta oferta de emprego público.

Quinto. As convocatorias das probas selectivas de acceso libre derivadas da presente oferta publicaranse no Diario Oficial de Galicia e no Boletín Oficial del Estado, para garantir a publicidade exixida no artigo 75.2 da Lei 6/2001, do 21 de decembro, de universidades, e executaranse dentro do prazo máximo previsto no artigo 70 do texto refundido da Lei do Estatuto básico do empregado público.

Santiago de Compostela, 20 de novembro de 2015

José Manuel Villanueva Prieto
Xerente da Universidade de Santiago de Compostela

ANEXO

Oferta de emprego público do persoal de administración e servizos da Universidade de Santiago de Compostela. Ano 2015

		Promoción interna	Acceso libre
Subgrupo/grupo	Escala/categoría	Cupo xeral	Cupo xeral	Cota de reserva de persoas con discapacidade
Persoal funcionario
A1	Técnico superior de administración USC	3	2
C1	Auxiliar de arquivo, bibliotecas e museos		5	1
Total prazas persoal funcionario		3	7	1
Persoal laboral
I	Analista informático	1
I	Médico de empresa	1
I	Técnico superior de investigación	1
Total prazas persoal laboral		3
	Total prazas convocadas	6	7	1