O 30 de decembro de 2015 publicouse no DOG a Resolución do 23 de decembro de 2015 pola que se establecen as bases reguladoras e se anuncia a convocatoria anticipada de subvencións para proxectos de equipamentos térmicos de biomasa, para o ano 2016, cofinanciadas polo Fondo Europeo de Desenvolvemento Rexional (Feder) no marco do programa operativo Feder-Galicia 2014-2020. Xunto coa citada resolución non se fixeron públicos os anexos, polo que cómpre agora proceder á súa publicación.

En consecuencia co anteriormente exposto e no exercicio das facultades que me confire o artigo 8 da Lei 3/1999, do 11 de marzo, de creación do Instituto Enerxético de Galicia (DOG núm. 61, do 30 de marzo).

ACORDO:

Primeiro. Facer públicos os anexos da Resolución do 23 de decembro de 2015 pola que se establecen as bases reguladoras e se anuncia a convocatoria anticipada de subvencións para proxectos de equipamentos térmicos de biomasa, para o ano 2016, cofinanciadas polo Fondo Europeo de Desenvolvemento Rexional (Feder) no marco do programa operativo Feder-Galicia 2014-2020.

Segundo. Modificar a data para presentar as solicitudes que figura no artigo 8.2 das bases reguladoras. O prazo será dun (1) mes, contado desde o día seguinte ao da publicación desta resolución no Diario Oficial de Galicia.

Terceiro. Procédese a facer a seguinte corrección de erros no artigo 15.1.a) das bases reguladoras:

Onde di: «a) Prestacións segundo as características do equipo xerador (ata 35 puntos)», debe dicir: «a) Prestacións segundo as características do equipo xerador (ata 40 puntos)».

Disposición derradeira. Entrada en vigor

Esta orde entrará en vigor o mesmo día da súa publicación no Diario Oficial de Galicia.

Santiago de Compostela, 12 de xaneiro de 2016

Ángel Bernardo Tahoces
Director do Instituto Enerxético de Galicia