CAMPAÑAS ACTUAIS

Bocaberta é o programa de dinamización lingüística que ten como obxectivo fomentar o uso da lingua galega nas franxas máis novas.  Trátase dun ambicioso programa de actividades, que se desenvolverán coa colaboración das principais editoriais en preto de 300 concellos de toda Galicia, dirixidas a nenos e mozos de entre 3 e 18 anos. Teatro, grafitti, emisións radifónicas, contacontos, exposicións, proxeccións audiovisuais... conforman Bocaberta. Está previsto que participen este ano en Bocaberta arredor de medio millón de nenos. Ademais, participan 11 editoriais nunha iniciativa na que os libros son unha parte da xénese do proxecto, que ten a oralidade como eixo fundamental. Desde Política Lingüística preténdese poñer en valor o poder da palabra a través da riqueza da nosa tradición oral, por iso algunhas das actividades de Bocaberta promoven a lingua galega mediante a recuperación dos contos populares e as músicas tradicionais.

As primeiras palabras que pronunciamos son a chave para abrir unha porta cara a nosa lingua e a nosa cultura. As Festas e os Encontros dos Axóuxeres son un espectáculo para o teu bebé e para toda a familia. Celébranse no mes de setembro e a entrada é de balde. Axóuxeres é unha proposta para beber cantigas, brincadeiras e aloumiños, metelos nos petos e levalos para a casa, para que o galego siga pasando de pais e nais a fillas e a fillos. Ver, cheirar, gustar, tocar, escoitar, falar con todos os nosos sentidos, isto son as festas e os encontros dos Axóuxeres. Axóuxeres é un espectáculo de palabras, arrolos, música, poesía, teatro…, un encontro para festexar a lingua galega.

www.oteumobilengalego.com: portal creado para que os usuarios e as usuarias poidan acceder a todos os recursos dispoñibles na nosa lingua para os seus terminais de telefonía e a toda a información sobre as compañías que lles ofrecen aos seus clientes produtos ou servizos en galego.

Permite coñecer os terminais que hai actualmente no mercado coa opción do galego e mediante que operadoras conseguilos. Disponse ademais a posibilidade de actualizar o móbil a través das descargas dispoñibles en "Galeguiza o teu móbil".

Con esta campaña, 15.000 familias recibirán materiais que se van distribuír a través da rede de centros do Servizo Galego de Saúde para todas as mulleres embarazadas. Así, a través das xerencias de Atención Primaria da Coruña, Santiago, Lugo, Pontevedra, Ourense e Vigo e da Área Sanitaria de Ferrol distribuiranse estes maletíns nos centros de atención primaria, nos hospitais e nos centros de orientación familiar. Tamén os centros médicos privados distribuirán os materiais.

Na consulta do seu médico, as futuras nais recibirán un maletín con información, consellos para o embarazo, un caderno de xestación, unha escolma de nomes galegos de neno e de nena, recitativos para o bebé e un CD que este ano se renova con base no jazz. En Aloumiños de seda, Abe Rábade púxolles música a seis poemas doutros tantos autores galegos. Ademais, o maletín inclúe outra novidade, un adhesivo deseñado polo debuxante Kiko Da Silva para lles pedir precaución aos condutores e sinalizar a presenza no coche do bebé.