O galego viaxa en febreiro a París para estar presente na Expolingua. Trátase dunha feira internacional que, dende hai 25 anos, busca promover o estudo das linguas, defendendo o multilingüismo e desenvolvendo a comunicación internacional.
A Secretaría Xeral de Política Lingüística da Xunta de Galicia contará cun expositor para difundir a lingua galega e as súas posibilidades de aprendizaxe, a través dos recursos na rede, dos centros de estudos galegos das universidades francesas e mais dos cursos de verán para estranxeiros en Galicia. Ademais, haberá minicursos de iniciación á lingua galega.
Para quen?
As expolinguas están abertas ao público xeral. Son de particular interese para os estudantes de linguas, ensinantes, profesionais da tradución, creadores de recursos para a aprendizaxe das linguas en diferentes soportes, medios de comunicación con obxectivos divulgativos de lingua e cultura, representantes de institucións relacionadas coa lingua, investigadores, etc
Que son as expolinguas?
As expolinguas son espazos de encontro de diversas institucións lingüísticas de todo o mundo e entidades de formación en idiomas, para favorecer o intercambio e a promoción da diversidade de linguas, así como para dar a coñecer ferramentas e posibilidades de aprendizaxe aos visitantes.
A presenza da Secretaría Xeral de Política Lingüística nestas feiras internacionais de linguas permite dar a coñecer aspectos básicos da situación do galego. Anualmente, o posto institucional da lingua galega preséntase en Lisboa, en París, en Berlín e, desde 2008, tamén en Londres.
Aprende linguas con Linguanet europa
Lectorados e centros de estudos galegos no mundo
