Decreto 332/2009, do 11 de xuño, polo que se establece a estrutura orgánica da Consellería de Educación e Ordenación Universitaria.
(Queda derrogado o Decreto 585/2005, do 29 de decembro, polo que se establece a estrutura orgánica da Consellería de Educación e Ordenación Universitaria, modificado polo Decreto 192/2008, do 28 de agosto, así como cantas disposicións de igual ou inferior rango se opoñan ao establecido no Decreto 332/2009).
A Secretaría Xeral de Política Lingüística é o órgano da Administración autonómica en materia de promoción e ensino da lingua galega e de dirección, planificación, coordinación e execución da política lingüística da Xunta de Galicia. A Secretaría Xeral de Política Lingüística ten como obxectivos impulsar o desenvolvemento e a aplicación da lexislación derivada do artigo 5 do Estatuto de autonomía de Galicia, velar pola aplicación da política lingüística que estableza o Goberno e coordinar as accións e medidas dos diversos departamentos da Xunta de Galicia en materia de política lingüística. Para acadar estes obxectivos, atribúenselle as seguintes funcións:
- Promover, impulsar e elaborar propostas lexislativas e regulamentarias que potencien a normalización lingüística e o fomento do uso da lingua galega.- Cooperar coa Comisión Interdepartamental da Xunta de Galicia para a Normalización Lingüística e impulsar e coordinar as medidas de política lingüística dos departamentos da Xunta de Galicia mediante a achega do soporte técnico necesario.- Programar e desenvolver medidas para o fomento do uso do idioma galego nos diferentes eidos sociais e económicos de Galicia co fin de incrementar a dispoñibilidade de produtos e servizos en galego.- Planificar e desenvolver campañas e medidas de fomento do uso, coñecemento e difusión do galego dentro e fóra do territorio lingüístico galego.- Promover, coordinar e desenvolver a política de investigación que favoreza a normalización lingüística nas súas diferentes manifestacións, especialmente no eido do léxico e a terminoloxía.- -Emitir informe dos proxectos de disposicións normativas de carácter xeral que promovan os departamentos da Xunta de Galicia sobre a normalización do uso do galego ou sobre a política lingüística en xeral.- Establecer o marco metodolóxico de referencia e os plans e programas para o ensino do galego ás persoas adultas, de acordo coas directrices do Consello de Europa en materia de ensino de linguas.- Colaborar co Consello de Europa e con outros organismos nacionais e internacionais en relación cos procesos para a defensa, a aprendizaxe, o ensino e a avaliación das linguas.- Convocar e administrar as probas e expedir os certificados de coñecemento de galego.- Convocar e administrar as probas e certificados de tradutoras e tradutores e de intérpretes xurados doutras linguas para o galego e viceversa, así como autorizar as habilitacións directas destes, cando procedan, e a súa inscrición no Rexistro Oficial de Profesionais da Tradución e Interpretación Xuradas doutras linguas para o galego e viceversa.- Promover o diálogo, a cooperación e a colaboración con outras institucións competentes en materia de política lingüística.
Para o exercicio das súas funcións, a Secretaría Xeral de Política Lingüística estrutúrase nas seguintes unidades:
1. Subdirección Xeral de Política Lingüística.
Correspóndelle a esta subdirección xeral as seguintes funcións:
- Apoio técnico-administrativo á persoa titular da Secretaría Xeral de Política Lingüística no exercicio das súas funcións.
- Coordinación e xestión dos plans e programas de formación e de acreditación de competencia en materia de lingua galega.
- Coordinación e xestión das actividades de formación e promoción da lingua galega, así como, a autorización e homologacións de cursos, seminarios, encontros e congresos de formación de lingua galega e/ou de linguaxes específicas, e a xestión das certificacións de aptitude ao alumnado, cando proceda.
- Xestión das validacións e solicitudes de recoñecemento de certificacións de cursos e outras actividades de formación e normalización da lingua galega (seminarios, encontros, etc.).
- Xestión das probas de acreditación da competencia en lingua galega e, de ser o caso, en materia de linguaxes específicas galegas.
- Apoio en materia de asesoramento lingüístico e produción e oferta de recursos tecnolóxicos para fomentar o uso da lingua galega.
- Xestión das solicitudes de traducións galego-castelán e viceversa de documentación, acordos e títulos oficiais que teñan orixe ou destino noutras comunidades autónomas ou en institucións da Unión Europea.
- Xestión das solicitudes de tradución ao castelán de títulos oficiais expedidos en galego que deben producir efectos en administracións públicas doutras comunidades autónomas do Estado español.
- Xestión das solicitudes de habilitación profesional para a tradución e interpretación xurada doutras linguas para o galego e viceversa e do Rexistro Oficial de Profesionais da Tradución e Interpretación.
- Xestión da produción de material didáctico para apoio á formación en lingua galega.
- Xestión da colaboración da Secretaría Xeral de Política Lingüística con organismos nacionais e internacionais para promover o fomento, a aprendizaxe, o ensino e a avaliación das linguas.
- Propoñer a resolución de recursos nas materias que desenvolve.
- Calquera outra análoga que lle sexa encomendada.
2. Subdirección Xeral de Planificación e Dinamización Lingüística.
Correspóndelle as seguintes funcións:
- Apoio técnico-administrativo á persoa titular da Secretaría Xeral de Política Lingüística no exercicio das súas funcións
- Coordinación e xestión das medidas para o fomento do uso do idioma galego nos diferentes ámbitos sociais e económicos de Galicia para incrementar a súa dispoñibilidade en produtos e servizos
- Coordinación e xestión das liñas de axuda e subvencións para o apoio á dinamización e promoción da lingua galega
- Coordinación e xestión das actividades de normalización e dinamización lingüística e as derivadas das campañas de promoción e difusión da lingua galega
- Coordinación, xestión e difusión dos recursos e/ou estudos necesarios para a promoción do galego
- Fomento das actividades de normalización e promoción da lingua galega en administracións públicas e noutras entidades
- Coordinación e xestión da participación en feiras, congresos e exposicións de difusión de linguas
- Fomento da produción de material didáctico para o apoio á formación en lingua galega e á normalización lingüística
- Coordinación da xestión de consultas e queixas en materia de dereitos lingüísticos
- Proposta de resolución de recursos nas materias que desenvolve; e calquera outra función de natureza análoga que lle sexa encomendada.
Para o desenvolvemento das súas funcións, esta subdirección contará coas seguintes unidades, con nivel orgánico de servizo e baixo a dirección desta subdirección xeral:
2.1. Servizo de Xestión e Promoción Lingüística.
Correspóndenlle as seguintes funcións:
- Elaborar o anteproxecto de orzamentos da Secretaría Xeral de Política Lingüística, exercer a súa xestión económico-administrativa e o seu control orzamentario.
- A xestión da contratación administrativa para a realización das actividades de formación, fomento e normalización da lingua galega, así como a dos convenios de colaboración con estas finalidades.
- Propoñer a resolución de recursos nas materias que desenvolve este servizo.
- Calquera outra análoga que lle sexa encomendada.
3. Intégrase na Secretaría Xeral de Política Lingüística, dependendo directamente do seu titular, a seguinte unidade con nivel orgánico de servizo:
3.1. Servizo do Centro Ramón Piñeiro para a Investigación en Humanidades.
Correspóndenlle, baixo a dirección da Secretaría Xeral de Política Lingüística, as seguintes funcións:- Xestionar o desenvolvemento dos proxectos e programas de estudos lingüísticos, literarios, históricos e antropolóxicos para a normalización da lingua galega.
- Promover a formación e capacitación de universitarios, tanto no ámbito galego como internacional, a través de convocatorias públicas para a investigación e o estudo de programas no ámbito das humanidades.
- Canalizar, difundir e proxectar no ámbito autonómico, estatal e internacional a información sobre os proxectos e publicacións do centro.
- Administración, xestión económico-administrativa e control do funcionamento do centro e do persoal adscrito a este.
- Xestionar, en coordinación cos directores técnicos dos departamentos do centro, a organización de xuntanzas, encontros, xornadas, congresos e simposios e calquera outra actividade que derive dos proxectos de investigación e formación.
- Exercer as funcións correspondentes á secretaría da Comisión Reitora do centro.
- Darlle apoio administrativo ao coordinador científico no desenvolvemento dos traballos de investigación do centro.
- Calquera outra análoga que lle sexa encomendada.
4. Nos departamentos territoriais da Coruña, Pontevedra, Lugo e Ourense existe un Gabinete de Normalización Lingüística, ao que lle corresponden, baixo a dirección da persoa titular da xefatura territorial e en coordinación coa Subdirección Xeral de Política Lingüística, as seguintes funcións:
- Proposta de programación, organización e xestión das actividades e dos cursos de lingua galega e de linguaxes especializadas que se desenvolvan no ámbito territorial da súa competencia.
- Proposta de nomeamento do profesorado para impartir os cursos que se organicen no ámbito territorial da súa competencia, de acordo cos criterios e co réxime de chamamentos establecido pola Secretaría Xeral de Política Lingüística.
- Xestión dos expedientes e propostas de gasto e pagamento das actividades e cursos desenvolvidos.
- Xestión de expedientes de axudas e subvencións.
- Información e atención ao público nas materias propias do ámbito de competencia da Secretaría Xeral de Política Lingüística.
- Desenvolver calquera outra función que, no ámbito da súa competencia, lle sexa encomendada pola Subdirección Xeral de Política Lingüística.
