Os primeiros xogos coas palabras son unha vivencia esencial da cultura que compartimos e unha maneira de aprender e de crear lazos de unión entre pais/nais e fillos/fillas. Coas palabras, coas cantarelas e cos enredos transmítense afectos, acougo para adormecer e motivación para espertar os sentidos. Tamén axudarán a iniciar de maneira lúdica o neno ou a nena na lingua galega, nos ritmos, na rima, na psicomotricidade. Velaquí tedes algúns xogos e cantigas para dicirlle con moito agarimo.
A bicos
Ai, que pequeno tan lindo,
tan bonito non o hai,
vou comerlle a cara a bicos
de bonitiño que está.
E durme, meu neno,
durme, meu amor,
que saíu a lúa,
tamén dorme o sol.
Ao meu neniño pequeno,
pequeno, como lle eu quero,
con vara e media de tea
fágolle un vestido e medio.
E durme, meu neno,
durme, meu amor,
que saíu a lúa,
tamén dorme o sol.
Tiroliro
O papá arrolaba á nena,
cantáballe este cantar:
"Cala, miña nena, cala,
cala se queres calar".
Durme ben, miña neniña,
que o teu pai vai no mercado,
hache de traer as roscas
e un tiroliro furado.
Arrorró, meu amor, arrorró...
Arrorró, arrorró, meu amor,
Arrorró...
A miña nena pequena
heina de levar á feira,
por un pano de rosquillas
heina dar a quen a queira.
A miña nena pequena,
pequena do corazón,
heina de levar á feira
vendela nun patacón.
Arrorró, meu amor, arrorró...
Arrorró, arrorró, meu amor,
Arrorró...
O meu neno de cristal
Ala ron, ron, ron,
durme, meu neniño,
ala ron, ron, ron,
durme, meu amor.
Ala ron, ron, ron…
O meu neno está no berce,
o meu neno de cristal.
As súas bágoas son de prata,
as meixelas de coral.
O meu neno está no berce
e eu non canso de o arrolar.
Os seus ollos son de ouro.
Calará ou non calará?
Ala ron, ron, ron…
O meu neno está no berce,
os olliños vai pechar.
Canta o moucho, cae a noite,
o meu neno dorme xa.
O meu neno está no berce
e eu non deixo de o vixiar.
Voan as ás agoreiras.
Soñará... que soñará?
Ala ron, ron, ron…
Corpiño de picote
A miña nena pequena
heina de aprender a todo,
a tocar e a bailar
antes que lle veña o sono.
Quérote, pequena,
quérote, meu sol,
durme decontado,
durme, meu amor.
Canta, miña rula, canta
e heiche mercar un mantelo,
un corpiño de picote
que xa vai vindo o inverno.
Quérote, pequena,
quérote, meu sol,
durme decontado,
durme, meu amor.
Bercer de Carme
Arrolei a nena,
arroleina ben,
arrolei a nena
pois lle eu quero ben.
Non quere durmir
e que lle farei?
Á miña pequena
eu a arrolarei.
A nena fermosa
non quere durmir,
pecha os olliños
e vólveos abrir.
Ora, miña nena,
ora do meu sol,
ora, pedaciño
do meu corazón.
Nana de sal
De sal veñan mil mareas,
de amor sexa o vendaval.
Deitei a miña serea,
galopa nun arroaz.
Soña e polo día volve a soñar,
baila na cuberta do teu soñar.
Voga e nunca deixes de vogar,
canta, cando vogues, mellor cantar.
De argazo chegan sementes,
de bicos o temporal.
Navega a miña pequena
nun barco de mazapán.
Soña e polo día volve a soñar,
baila na cuberta do teu soñar.
Voga e nunca deixes de vogar,
canta, cando vogues, mellor cantar.
Soña e nunca deixes de soñar,
baila na cuberta do teu soñar...
