Medallas de Galicia 1996
Medallas de Ouro 1996
Jorge Fernando Branco de Sampaio
Lisboa, 1939
Presidente da República de Portugal
Fillo dun médico da sanidade pública e dunha profesora de inglés, realiza os seus estudos entre Sintra e Lisboa, onde se licencia en Dereito en 1961.
Por obrigas profesionais do seu pai, parte da súa infancia transcorre en Estados Unidos e o Reino Unido, feito que inflúe moito nel. Comeza o seu activismo político na universidade, onde fai campaña a favor da candidatura presidencial do xeneral Humberto Delgado.
Como avogado, ten un relevante papel como defensor de presos políticos ante o Tribunal Plenario de Lisboa. Nos períodos previos e posteriores á Revolución dos Caraveis, intégrase en organizacións de oposición á Ditadura e promove diversos movementos de esquerdas, propugnando o parlamentarismo como mellor sistema político.
En 1978, invitado por Mario Soares, intégrase no Partido Socialista, obtendo ao ano seguinte a acta de deputado. Alcanza a secretaría xeral en 1989 e nese mesmo ano é elixido alcalde de Lisboa, posto que lle reporta unha grande popularidade pola súa xestión modernizadora e que o catapulta para obter a Presidencia da República en 1996, na que permanece 10 anos.
A súa presidencia estivo marcada por varias cohabitacións co conservador Partido Social-Demócrata (PSD). Actualmente é Alto Comisionado da ONU para a Alianza das Civilizacións.
Jorge Sampaio escribiu numerosos ensaios políticos e sobre dereito, e foi recoñecido, ademais de coa Medalla de Ouro de Galicia, co Premio Europeo Carlos V da Academia Europea de Iuste e o Premio Norte-Sur do Consello de Europa, entre outros.
Museo de Pontevedra
Institución para a divulgación e investigación cultural en Pontevedra
Créase en 1927 pola Deputación Provincial de Pontevedra, á iniciativa dos deputados Gaspar Massó, César Lois e Alfredo Espinosa, co fin de completar o labor da Sociedade Arqueolóxica de Pontevedra, á que sucede e da que recibe un importante legado.
Desde os seus comezos o museo concíbese, non como almacén de pezas, senón como centro de estudo, coñecemento e divulgación da cultura galega en todas as súas facetas.
O museo conta con seis edificios, a maioría no casco histórico de Pontevedra, reúne máis de 16.000 pezas e dispón dunha biblioteca con máis de 50.000 exemplares. Nas súas salas pódese contemplar, desde obra pictórica de autores como Ribalta, Ribera, Zurbarán, Murillo, Ferreiro, García de Bouzas, Sotomayor ou Fernández Taibo, entre outros; ata exemplos das distintas etapas de Sargadelos, pasando por traballos en acibeche relacionados coas peregrinacións a Santiago. Tamén pode verse arqueoloxía, ourivaría prerromana e romana, ourivaría popular e civil, restos arquitectónicos, mobiliario, instrumentos musicais e un grande número de elementos vinculados á tradición mariñeira.
Mención á parte merece o legado de Castelao, composto por máis de 1.000 obras, entre óleos, augadas, plumiñas, notas coloreadas, temples…, imprescindibles para comprender a súa visión de Galicia.
Medallas de Prata 1996
Medallas de Bronce 1996
Discursos
- Discurso do Presidente da Xunta de Galicia no acto de entrega da Medalla de Galicia 1996