Santiago, 1 de decembro de 2011.- Santiago de Compostela acollerá a mediados do ano que vén a presentación final do proxecto europeo REACH 112, unha iniciativa pioneira na que Galicia participa como socia a través da Xunta e que ten por obxectivo facilitar que os usuarios con discapacidades auditivas e da fala poidan acceder directamente ao número único de emerxencias 112.

Así o anunciou esta mañá o conselleiro de Presidencia, Administracións Públicas e Xustiza, Alfonso Rueda, tras manter un encontro co director executivo da Asociación do Número de Emerxencias Europeo (EENA), Gary Machado, para abordar a organización e coordinación xunto coa Axencia Galega de Emerxencias -anfitrioa das xornadas- de todo o referente á realización do evento.

Despois de tres anos de traballo o proxecto rematará coa súa presentación final en Santiago de Compostela os vindeiros 19 e 20 de xuño de 2012. Neste evento, baixo o lema ‘Accesibilidade aos servizos de emerxencia e a seguinte xeración de servizos de emerxencia’, a capital galega congregará arredor duns 200 profesionais do sector dos servizos de emerxencias implicados na accesibilidade dos discapacitados co 112.

A socia europea EENA é a organización encargada de toda a labor de divulgación dos avances logrados nesta iniciativa europea, o que inclúe, entre outras actividades, a realización de simposios e debates. Por este motivo, ademais do encontro co conselleiro e o director xeral de Emerxencias -Santiago Villanueva-, Machado aproveitará a súa visita a Galicia para coñecer as instalacións do 112 Galicia e da Escola Galega de Administración Pública (Egap), onde se celebrará o evento.

Igualdade de condicións perante as emerxencias
A Xunta de Galicia, a través da Axencia Galega de Emerxencias (Axega), participa no proxecto europeo REACH 112, “Responding to All Citizens needing Help”/ Resposta a todos os cidadáns que precisan axuda”, un programa pioneiro que garantirá a atención en caso de emerxencias ás persoas con minusvalías e discapacidades auditivas e de fala.

Coa súa participación no proxecto, Galicia convértese na primeira Comunidade Autónoma española en dar resposta ás emerxencias para todas aquelas persoas con este tipo de discapacidades; que ata o de agora non podían -agás a intervención de terceiros- comunicar e solicitar resposta as situacións de emerxencias nas que se viran afectadas.

Conseguirase así garantir que as persoas discapacitadas poidan directamente acceder ao 112 en igualdade de condicións que o resto dos cidadáns, avanzando así decididamente no camiño da súa plena integración.

Así, o REACH 112 achega solucións para comunicarse en calquera situación, ben a través de comunicación escrita, linguaxe de signos, lectura de beizos, con voz ou con calquera combinación simultánea dos citados modelos baixo o concepto de comunicación total.

Neste sentido, proporciónanse dispositivos especialmente adaptados en fogares, lugares de traballo e desprazamentos, que conectarán aos usuarios simultaneamente a través de vídeo, son e texto. Con esta iniciativa lidérase a mellora de comunicacións entre os cidadáns, en particular daqueles con algún tipo de discapacidade, ademais da accesibilidade e o tratamento de chamadas dos servizos de emerxencias de toda a Unión Europea.

Galicia, exemplo de Europa
Para participar nesta iniciativa pioneira, o CAE 112 foi escollido xunto con outras tres centros de emerxencias de entre todos os existentes en Europa. O motivo da selección do centro galego foi a súa evolución, desenrolo e experiencia na xestión de emerxencias nun territorio singularizado polas súas condicións orográficas e de dispersión poboacional, o que constitúe un interesante campo de proba para este novidoso sistema de resposta total do que se extraerán importantes consecuencias para a súa implantación no resto de Europa.

Esta iniciativa internacional é un proxecto a tres anos (xullo 2009-xuño 2012) cun orzamento de 8,8 millóns de euros, financiado nun 50 por cento pola Unión Europea e no que participan 22 socios de toda Europa, incluíndo organizacións de usuarios e as principais compañías mundiais de telecomunicacións. No caso español, ademais da AXEGA, participan como socios do proxecto as empresas Siemens e Sertel.