Nigrán, 13 de febreiro de 2012.- A Consellería de Cultura e Educación comezou hoxe no IES Val Miñor unha serie de charlas informativas para a prevención do consumo de drogas. Dirixidas a alumnos e alumnas dos institutos de Secundaria, as conferencias están impartidas por dous internos e un membro do equipo do Módulo Terapéutico do Centro Penitenciario da Lama, e teñen coma obxectivo xeral informar e intentar concienciar aos xoves escolares dos perigos que supón o consumo de drogas.

A delegada territorial da Xunta en Vigo, María José Bravo Bosch, acompañada polo xefe territorial de Educación, César Pérez Ares, e responsables da cárcere da Lama, participou esta mañá na presentación das charlas no instituto miñorano, e recordou a importancia deste programa informativo que hoxe se pon en marcha para que os xoves estudantes coñezan de primeira man as experiencias persoais dos internos e as consecuencias que para eles tivo o consumo de drogas. Ante un grupo de alumnos e alumnas de 4º da ESO do IES Val Miñor, a representante da Administración autonómica en Vigo, explicou tamén que as conferencias serven para que os estudantes coñezan outras alternativas para non caer nas adiccións que supón o consumo de drogas.

As charlas, que terán continuidade nos vindeiros meses en diversos institutos da provincia, se poñen en marcha tralo acordo ao que chegou o departamento territorial da Consellería de Cultura e Educación co Centro Penitenciario da Lama. A vindeira sesión informativa será o 27 de febreiro no IES Ramón Mª Oier de Lalín para continuar despois polos centros de secundaria de Cangas, Mondariz, Ponteares, Pontevedra ou Catoira, entre outros.

Deste xeito, dixo a delegada, o equipo e os internos do programa do Módulo Educativo-Terapéutico do centro penitenciario, póñense a disposición da Administración educativa ofertando a súa colaboración no eido da prevención e dende unha perspectiva puramente informativa e educativa. Os internos que participan nesta iniciativa reciben unha formación específica impartida por unha psicóloga da Cruz Vermella e atópanse en condicións de ofertar a súa experiencia e coñecementos de cara a concienciación dos máis novos sobre os riscos que se corren cando se consumen drogas.

Bravo Bosch engadiu que con este tipo de actividades preténdese tamén favorecer o cambio de actitudes e o desenvolvemento de habilidades nos internos-usuarios do programa da cárcere da Lama potenciando, ademais, a competencia social dos mesmos. “O obxectivo é así dobre”, considerou a delegada territorial da Xunta en Vigo xa que, por unha banda, “se achegan as experiencias persoais dos internos” aos xoves estudantes para previr o consumo de drogas e, por outra, “se axuda a que os presos se sintan membros constituíntes da sociedade ao serlle recoñecido un papel e ao sentirse valorados pola súa aportación e contribución a un propósito social e de prevención”, concluíu.