Visto o Real decreto 736/1988 que dispón como reforma de importancia a incorporación de dispositivos para remolcar (gancho, bola ou 5ª roda).
A citada norma, no seu artigo 3.2º, apartado 2 establece que as reformas de importancia poderán ser realizadas polo fabricante do vehículo ou talleres legalmente autorizados na especialidade correspondente, que dispoñan dos medios axeitados para o tipo de reforma a realizar.
Vistas as peticións de autorización para instalación de enganche a remolques e turismos.
Vistos os informes dos servicios técnicos das delegacións provinciais de Industria.
Considerando que o Decreto 206/1994, do 16 de xullo, polo que se adapta a normativa vixente en materia de prestación de servicios nos talleres de reparación de vehículos e dos seus equipos e compoñentes, no Art. 3.5º, establece que a Dirección Xeral de Industria, por instancia do interesado ou das asociacións de talleres poderán autorizar especialidades.
Esta dirección xeral,
RESOLVE:
Autoriza-la especialidade de montaxe de dispositivos de remolcar, ata un peso máximo de 3.500 Kg, dentro da actividade dos talleres de reparación de automóbiles e dos seus equipos e compoñentes.
O equipamento mínimo esixible a esta especialidade, para a súa autorización e correspondente inscrición no Rexistro Especial de Talleres de reparación de vehículos será o seguinte:
-Trade portátil, con portabrocas ata 16 mm.
-Banco de traballo con torno.
-Foso ou elevador adecuado.
-Gato hidráulico sobre carro.
-Chave dinamométrica.
-Un xogo de chaves tipo Allen.
-Un xogo de chaves fixas planas.
-Un xogo de chaves de estrela planas.
-Un xogo de chaves acobadadas.
-Un xogo de chaves de vaso articuladas.
-Un xogo de alicates (universal, puntas e illados).
-Un xogo de desaparafusadores (planos, estrela e illados).
-Un calibre pé de rei.
-Un arco de serra de metais.
-Un xogo de limas: bastas, semifinas e finas.
-Unhas tenaces para terminais preillados.
-Unhas tenaces pelacables.
-Un comprobador tester para c.c., tensión e intensidade (0-10 A.) con puntas de proba e continuidade.
A placa distintiva, será das características indicadas no Decreto 206/1994 e o distintivo estará constituído por unha representación esquemática dun dispositivo de remolcar de bola, de cor azul sobre fondo branco.
Contra a presente resolución, que non esgota a vía administrativa poderá poñerse recurso ordinario ante o conselleiro de Industria e Comercio no prazo de 1 mes a contar desde a súa publicación no Diario Oficial de Galicia de conformidade co establecido no artigo 114.2º, en relación co artigo 48 da Lei 30/1992, do 26 de novembro, de réxime xurídico das administracións públicas e do procedemento administrativo común.
Santiago de Compostela, 20 de marzo de 1995.
Joaquín del Moral Crespo
Director xeral de Industria