O artigo 148.1.11 da Constitución establece que as comunidades autónomas poderán asumir competencias en «materia de pesca en augas interiores, marisqueo e acuicultura». Por outra parte, o artigo 149.1.19 outórgalle ao Estado a competencia exclusiva sobre «a pesca marítima, sen prexuízo das competencias que na ordenación do sector se atribúan as comunidades autónomas».
Sobre a base de tal fundamento constitucional, o Estatuto de autonomía para Galicia establece que corresponde á Comunidade Autónoma galega a competencia exclusiva sobre «a pesca nas rías e demais augas interiores, o marisqueo e a acuicultura» (artigo 27.15), e sobre «as confrarías de pescadores» (artigo 27.29), así como o desenvolvemento lexislativo e a execución da lexislación do Estado da materia «ordenación do sector pesqueiro» (artigo 28.5).
No exercicio destas competencias, aprobouse a Lei 11/2008, do 3 de decembro, de pesca de Galicia, cuxa disposición adicional décimo segunda establece a obrigatoriedade, para as persoas físicas ou xurídicas que realicen actividades de pesca profesional, marisqueo ou acuicultura, de constituír un seguro que garanta a cobertura de posibles danos a terceiros, obrigatoriedade establecida ao abeiro do artigo 75 da Lei 50/1980, do 8 de outubro, de contrato de seguro.
Enténdese desde a Consellería do Mar que a actividade profesional da pesca, marisqueo e da acuicultura mariña constitúe un risco en si mesma, como o avalan o número de danos ocasionados polos sinistros acaecidos no sector.
A Lei 50/1980, do 8 de outubro, atribúe á Administración a posibilidade de determinar que actividades non se poden desenvolver sen a cobertura do mencionado seguro, o que precisou a referida disposición adicional décimo segunda da Lei de pesca de Galicia.
Para cumprir esta previsión legal estímase necesario, en relación coas coberturas respecto a posibles danos a terceiros, establecer uns límites de aseguramento tendo en conta a experiencia acumulada no sector.
De acordo co anteriormente exposto, en virtude das facultades establecidas polo artigo 34 da Lei 1/1983, do 22 de febreiro, de normas reguladoras da Xunta e da súa Presidencia,
DISPOÑO:
Artigo 1. Obxecto.
Esta orde ten por obxecto establecer os límites cuantitativos que deberán conter os seguros de danos a terceiros a que se refire a disposición adicional décimo segunda da Lei 11/2008, do 3 de decembro, de pesca de Galicia, cando se subscriban para embarcacións de pesca e marisqueo que precisen do permiso de explotación para realizar a actividade extractiva, así como para embarcacións auxiliares de acuicultura que desenvolvan a súa actividade en augas competencia da Comunidade Autónoma de Galicia.
Para os efectos desta orde, terá a consideración de seguro de danos a terceiros calquera seguro de responsabilidade civil amparado baixo os termos e condicións establecidos na Lei 50/1980, do 8 de outubro, de contrato de seguro, e lexislación concordante aplicable.
Artigo 2. Límites cuantitativos.
En relación coas coberturas respecto a posibles danos a terceiros, establécense os seguintes límites mínimos ás sumas máximas aseguradas por sinistro ou ocorrencia:
a) Un millón de euros para aquelas embarcacións cuxa tripulación non supere as cinco persoas.
b) Vinte e cinco millóns de euros para as embarcacións cuxa tripulación supere as cinco persoas.
Artigo 3. Indicacións.
Dentro dos termos e condicións establecidos na Lei 50/1980, do 8 de outubro, de contrato de seguro, e lexislación concordante aplicable, a póliza en que se formalice o contrato de seguro de responsabilidade civil debe recoller, polo menos, as seguintes indicacións:
a) Salvo pacto en contrario, o asegurador asumirá a dirección xurídica fronte á reclamación do prexudicado, e serán pola súa conta os gastos de defensa que se ocasionen. O asegurado deberá prestar a colaboración necesaria á dirección xurídica asumida polo asegurador.
b) O prexudicado ou os seus herdeiros terán acción directa contra o asegurador para esixirlle o cumprimento da obriga de indemnizar, sen prexuízo do dereito do asegurador a repetir contra o asegurado, no caso de que sexa debido a conduta dolosa deste, o dano ou prexuízo causado a terceiro.
Disposición derradeira única. Entrada en vigor.
Esta orde entrará en vigor o día seguinte ao da súa publicación no Diario Oficial de Galicia.
Santiago de Compostela, 28 de abril de 2011.
Rosa María Quintana Carballo
Conselleira do Mar