O Consello Asesor do Sistema Público de Saúde de Galicia defínese como o órgano non colexiado superior de consulta e asesoramento da Consellería de Sanidade, directamente dependente da/o titular desta, que estará integrado maioritariamente por profesionais do Sistema Público de Saúde de Galicia.

A Orde do 25 de maio de 2005 regula a súa composición, organización e funcionamento, establecendo que estará constituído por un máximo de quince membros, nomeados por Orde da conselleira de Sanidade do 24 de xuño de 2009 entre profesionais do sistema sanitario galego e persoas de recoñecida competencia relacionadas coa actividade científica ou técnica nos eidos da saúde pública, a asistencia sanitaria, a docencia, a formación e a investigación.

Coa finalidade de incluír nesta composición o persoal nomeado emérito como consecuencia da súa traxectoria especialmente distinguida na asistencia, na docencia ou na investigación sanitaria, aproveitando desa forma a experiencia e os coñecementos adquiridos durante a súa vida laboral, cómpre modificar o artigo 2 da Orde do 25 de maio de 2005 e incrementar o número de membros do Consello Asesor, que pasan dun máximo de quince a un máximo de vinte.

De acordo co disposto no artigo 78.2 da Lei 8/2008, do 10 de xullo, de saúde de Galicia, e no uso das facultades que me confiren o artigo 38 da Lei 1/1983, do 22 de febreiro, reguladora da Xunta e da súa Presidencia, modificada pola Lei 11/1988, do 20 de outubro,

DISPOÑO:

Artigo único. Modifícase o punto 1 do artigo  2 da Orde do 25 de maio de 2005, pola que se regula a composición, organización e funcionamento do Consello Asesor do Sistema Sanitario de Galicia, que queda redactado como segue:

«Artigo 2. Composición.

1. O Consello Asesor do Sistema Sanitario de Galicia estará constituído por un máximo de vinte (20) membros, escollidos entre profesionais do sistema sanitario galego e persoas de recoñecida competencia relacionados coa actividade científica ou técnica nos eidos da saúde pública, a asistencia sanitaria, a docencia, a formación e a investigación».

Disposición derradeira.

Esta orde entrará en vigor o mesmo día da súa publicación no Diario Oficial de Galicia.

Santiago de Compostela, 6 de outubro de 2011.

Pilar Farjas Abadía
Conselleira de Sanidade