Conforme os criterios reitores das bases de mobilidade voluntaria do persoal estatutario fixo, correspondente ás categorías de persoal sanitario diplomado, sanitario de formación profesional, e de persoal de xestión e servizos das institucións sanitarias de atención especializada do Servizo Galego de Saúde, aprobadas pola Mesa Sectorial o 23 de decembro de 2009, a Dirección Xerencia do Complexo Hospitalario Xeral-Calde (Hospital Universitario Lucus Augusti), despois dun proceso de negociación coa Xunta de Persoal deste centro sanitario, e con base nas competencias atribuídas polo Decreto 97/2001, do 22 de marzo (DOG nº 93, do 15 de maio), de regulación básica dos órganos de dirección, asesoramento, calidade e participación das institucións hospitalarias do Servizo Galego de Saúde,

RESOLVE:

Primeiro. Anunciar a convocatoria do procedemento de mobilidade interna voluntaria entre unidades/servizos do Complexo Hospitalario Xeral-Calde (Hospital Universitario Lucus Augusti) para o persoal fixo das categorías de persoal sanitario diplomado, sanitario de formación profesional e persoal de xestión e servizos.

Segundo. A solicitude para participar no presente procedemento axustarase necesariamente ao modelo normalizado existente para o efecto na Oficina Virtual do Profesional (FIDES/Procesos/Traslados Internos) e, logo da súa formalización electrónica, deberase imprimir, asinar e tramitar o correspondente rexistro administrativo mediante a súa presentación por duplicado, dentro do correspondente prazo, preferentemente no Rexistro Xeral do Hospital Universitario Lucus Augusti (segundo andar do recinto hospitalario), ou no punto de atención ao Expedient-e (cuarto andar do recinto hospitalario) na rúa Dr. Ulises Romero nº 1, 27003 Lugo.

Tamén poderá presentarse nas oficinas de rexistro da Xunta de Galicia, nos rexistros das direccións provinciais do Servizo Galego de Saúde e nos rexistros dos centros hospitalarios, das xerencias de atención primaria, das xerencias de atención integrada, ou a través de calquera dos procedementos do artigo 38 da Lei 30/1992, do 26 de novembro, de réxime xurídico das administracións públicas e do procedemento administrativo común.

Os méritos que se pretendan facer valer serán os causados polos aspirantes ata o día inmediatamente anterior, inclusive, ao da publicación no Diario Oficial de Galicia da presente convocatoria, e deberán estar incorporados no expediente persoal electrónico (Expedient-e) antes do día de fin de presentación de solicitudes, tendo en conta os requisitos establecidos na Orde do 8 de maio de 2012 (DOG nº 92, do 15 de maio) pola que se regula o contido, uso e acceso ao expediente persoal electrónico dos profesionais do sistema público de saúde de Galicia; non serán considerados outros méritos distintos dos presentados do referido xeito.

O prazo para a presentación de solicitudes comezará ao día seguinte da publicación desta resolución no Diario Oficial de Galicia e rematará o día 31 de outubro de 2012.

Facilitarase información aos concursantes, respecto da formalización da solicitude de participación, na Oficina Virtual do Profesional (FIDES/Procesos/Traslados Internos) dentro da epígrafe «Axuda». Ademais, para calquera consulta relacionada coa presente convocatoria, os interesados poderán dirixirse á Oficina de Atención ao Traballador do Hospital Universitario Lucus Augusti (atencion.traballador.lucusaugusti@sergas.es), ext.: 53 61 84/53 64 71/ 53 61 86/53 63 18; tlfnos.: 982 29 61 84/982 29 64 71/982 29 61 86/982 29 63 18; así como ao punto de atención ao Expedient-e, onde se lles prestará o asesoramento técnico que sexa preciso e se proporcionará o acceso aos equipamentos informáticos aos participantes que non dispoñan dos ditos medios.

Terceiro. As bases íntegras da presente convocatoria, as resolucións e demais actos derivados dela serán publicados, en todo caso e sen prexuízo do emprego doutros medios de publicidade, nos taboleiros de anuncios do Hospital Universitario Lucus Augusti, e no taboleiro de anuncios do Complexo Hospitalario Xeral-Calde (na área de xestión do centro de Calde), designándose para os efectos do disposto no artigo 59.6.b) da Lei 30/1992, do 26 de novembro, de réxime xurídico das administracións públicas e do procedemento administrativo común, o taboleiro de anuncios sito no segundo andar do Hospital Universitario Lucus Augusti (na Oficina de Atención ao Traballador).Tamén estarán expostas na intranet do propio hospital (taboleiro dixital).

Cuarto. Contra esta resolución e as bases do procedemento, que non poñen fin á vía administrativa, conforme a Lei 6/2001, do 29 de xuño (DOG nº 135, do 12 de xullo), de adecuación da normativa da Comunidade Autónoma galega á Lei 4/1999, do 13 de xaneiro, de modificación da Lei 30/1992, do 26 de novembro, de réxime xurídico das administracións públicas e do procedemento administrativo común, poderase interpoñer recurso de alzada perante o mesmo órgano que ditou o acto ou ante o competente para resolvelo, que será a Dirección de Recursos Humanos do Servizo Galego de Saúde, no prazo dun mes contado desde o día seguinte ao da súa publicación, de conformidade cos artigos 114 e seguintes da Lei 30/1992 citada.

Así mesmo, cantos actos administrativos deriven da presente convocatoria poderán ser impugnados polos interesados nos casos e na forma establecidos na Lei 30/1992, do 26 de novembro, de réxime xurídico das administracións públicas e do procedemento administrativo común.

Lugo, 14 de setembro de 2012

Francisco J. Vilanova Fraga
Director xerente do Complexo Hospitalario Xeral-Calde de Lugo