Unha vez que o persoal laboral que superou os últimos procesos selectivos convocados para o acceso ás distintas categorías dos grupos I, II, III e IV do persoal laboral da Administración da Xunta de Galicia elixiu destino definitivo, procede abrir os prazos posesorios dos postos adxudicados na Orde do 28 de febreiro de 2013 (DOG núm. 47, do 7 de marzo) pola que se resolve o concurso para a provisión de postos de traballo vacantes dos ditos grupos.

Entre as prazas adxudicadas no concurso atópanse os postos do grupo IV das categorías 4 (auxiliar coidador) e 5 (oficial 2ª de cociña) que na súa práctica totalidade están adscritos ás aulas de educación especial e ao servizo de comedor de centros de educación primaria e secundaria xestionados pola Consellería de Cultura, Educación e Ordenación Universitaria.

Coa finalidade de evitar alteracións que afecten negativamente o desenvolvemento académico dos nenos con necesidades especiais e causen disfuncións nos servizos de comedor, a Dirección Xeral de Centros e Recursos Humanos solicitou o aprazamento da toma de posesión ata a finalización do curso escolar.

Para garantir a axeitada prestación do servizo, esta consellería

DISPÓN:

Primeiro. A apertura do prazo de toma de posesión dos postos adxudicados pola Orde do 14 de maio de 2012 agás os postos reservados ás categorías profesionais IV-4 e IV-5.

O prazo de toma de posesión comezará a contarse a partir do día seguinte ao do cesamento e será de tres días hábiles se o posto de traballo radica na mesma localidade de residencia habitual do concursante ou dun mes se radica en localidade distinta e supón un cambio de residencia debidamente xustificado.

O cesamento deberá efectualo a consellería a que figure adscrito o traballador dentro dos tres días hábiles seguintes á publicación desta orde no Diario Oficial de Galicia.

Se a adxudicación comporta o reingreso ao servizo activo, o prazo de toma de posesión será dun mes que deberá computarse desde o día seguinte á publicación desta orde no Diario Oficial de Galicia.

Segundo. O adiamento do prazo de toma de posesión dos postos adxudicados pola Orde do 14 de maio de 2012 reservados ás categorías IV-4 e IV-5.

O prazo para o cesamento e toma de posesión deste persoal iniciarase o día 28 de xuño de 2013.

Terceiro. Contra esta orde pódese interpoñer reclamación administrativa previa ante a conselleira de Facenda, no prazo dun mes contado a partir do día seguinte ao da publicación no Diario Oficial de Galicia, en aplicación dos artigos 120 e seguintes da Lei 30/1992, do 26 de novembro, de réxime xurídico das administracións públicas e do procedemento administrativo común e demais disposicións concordantes.

Santiago de Compostela, 2 de abril de 2013

Elena Muñoz Fonteriz
Conselleira de Facenda