Dentro do plan de actividades da Escola Galega de Administración Pública para o ano 2013 e de acordo coas funcións atribuídas pola Lei 4/1987, do 27 de maio, de creación da Escola, e pola Lei 10/1989, do 10 de xullo, de modificación da anterior, convócase, en colaboración co Colexio de Enxeñeiros de Camiños, Canais e Portos de Galicia, e segundo o convenio asinado entre ambos os dous organismos o día 16.10.2013, o Curso técnico sobre construción e explotación de vertedoiros. Orde do 20 de xullo de 2009 pola que se regula a construción e a xestión dos vertedoiros na Comunidade Autónoma de Galicia, conforme as seguintes bases:
Primeira. Obxectivos
O obxecto da Orde do 20 de xullo de 2009 pola que se regula a construción e a xestión dos vertedoiros no ámbito da Comunidade Autónoma de Galicia é o establecemento dunha normativa técnica axeitada para as actividades de eliminación de residuos mediante depósito en vertedoiros, en desenvolvemento do disposto no Real decreto 1481/2001, do 27 de decembro, polo que se regula a eliminación de residuos mediante depósito en vertedoiro.
Na orde están recollidos os criterios de deseño, construción e explotación dos vertedoiros en Galicia. O obxecto deste curso técnico será dar a coñecer e afondar nestes criterios, con responsables da Administración autonómica, a través da Secretaría Xeral de Calidade Ambiental, técnicos redactores de proxectos de vertedoiros e responsables de empresas explotadoras.
Segunda. Contidos
• Bloque I. Deseño e técnicas construtivas nos vertedoiros da Comunidade Autónoma de Galicia:
– Procedementos legais e administrativos. Lei 16/2002, do 1 de xullo, de prevención e control integrados da contaminación, e Orde do 20 de xullo de 2009 pola que se regula a construción e xestión dos vertedoiros no ámbito da Comunidade Autónoma de Galicia.
– Contido básico do proxecto construtivo dun vertedoiro. Lei 16/2002, do 1 de xullo, de prevención e control integrados da contaminación, e Orde do 20 de xullo de 2009 pola que se regula a construción e xestión dos vertedoiros no ámbito da Comunidade Autónoma de Galicia.
– Captación de augas superficiais. Cálculos xustificativos das infraestruturas proxectadas.
– Topografía e comprobación de estabilidade. Cálculos xustificativos.
– Captación e tratamento de lixiviados e biogás. Cálculos xustificativos das infraestruturas proxectadas.
• Bloque II. Materiais na construción de vertedoiros na Comunidade Autónoma.
– Plan de control de calidade e informe final de garantía de control de calidade na instalación de xeosintéticos. Orde do 20 de xullo de 2009 pola que se regula a construción e a xestión dos vertedoiros no ámbito da Comunidade Autónoma de Galicia.
– Desenvolvemento do plan de control de calidade en obra.
– Xeosintéticos. Xeotéxtiles e produtos relacionados.
– Xeomembranas.
– Barreiras xeosintéticas arxilosas (GBR-C) e o seu deseño en función da permeabilidade aos lixiviados dun vertedoiro.
• Bloque III. Xestión dos vertedoiros na Comunidade Autónoma de Galicia.
– Criterios e procedemento de admisión de residuos nun vertedoiro. Orde do 20 de xullo de 2009 pola que se regula a construción e a xestión dos vertedoiros no ámbito da Comunidade Autónoma de Galicia.
– Control documental e libro de rexistro na actividade de eliminación de residuos en vertedoiro. Lei 22/2011, do 28 de xullo, de residuos e solos contaminados, e Decreto 59/2009, do 26 de febreiro, polo que se regula a rastrexabilidade dos residuos.
– Plan de vixilancia e control ambiental durante a explotación do vertedoiro. Orde do 20 de xullo de 2009 pola que se regula a construción e a xestión dos vertedoiros no ámbito da Comunidade Autónoma de Galicia.
– Plan e métodos de explotación dun vertedoiro.
– Sistemas de tratamento e xestión dos lixiviados e biogás xerados no vertedoiro.
• Bloque IV. Visita a un vertedoiro. Visita ás instalacións de eliminación de residuos non perigosos.
Terceira. Destinatarios
– Profesionais que desexen coñecer da man de técnicos da Administración a orde que regula a construción e xestión de vertedoiros e ter ao mesmo tempo a visión que achegan os proxectistas e responsables da súa xestión.
– Proxectistas, directores de obra, xefes de obra, xefes de oficina técnica, coordinadores de seguridade e saúde etc., que queiran coñecer o seu papel nos diferentes ámbitos de traballo do deseño, construción e explotación de vertedoiros.
– Responsables de xestión e explotación de vertedoiros.
– Estudantes de enxeñaría.
Cuarta. Desenvolvemento
Este curso técnico desenvolverase na aula número 5 da Escola Galega de Administración Pública (EGAP) os días 9 e 10 de decembro, segundo o seguinte horario:
– Día 9.12.2013:
Mañá: das 9.00 ás 13.45 horas. Tarde: das 16.00 ás 19.30 horas.
– Día 10.12.2013:
Mañá: das 9.00 ás 13.45 horas (clausura). Tarde (visita a un vertedoiro): das 16.00 ás 18.30 horas.
Duración: este curso técnico terá unha duración de 16 horas lectivas.
Quinta. Número de prazas
Limitado pola capacidade do local.
Sexta. Solicitudes e pagamento
A inscrición e o pagamento da matrícula deberán formalizarse a través do Colexio de Enxeñeiros de Camiños, Canais e Portos de Galicia (http://www.ciccpgalicia.es).
Sétima. Prazo de inscrición e presentación de solicitudes
O prazo de presentación de solicitudes finalizará o mércores 4 de decembro de 2013.
Oitava. Certificado de aproveitamento
Entregarase un certificado de aproveitamento a aquelas persoas inscritas que participasen asiduamente, e sempre que a súa asistencia sexa igual ou superior ao 90 % das horas lectivas programadas. Neste documento aparecerán de forma expresa o contido, a data e o lugar de realización deste curso técnico.
Novena. Modificacións e incidencias
A EGAP e o Colexio de Enxeñeiros de Camiños, Canais e Portos de Galicia reservan para si a facultade de interpretar e de resolver as incidencias que poidan xurdir no desenvolvemento deste curso técnico, así como a facultade de cancelalo se o escaso número de solicitudes non xustificase a súa realización.
Santiago de Compostela, 31 de outubro de 2013
Sonia Rodríguez-Campos González
Directora da Escola Galega de Administración Pública