Dentro do plan de actividades da Escola Galega de Administración Pública para o ano 2014 e de acordo coas funcións atribuídas pola Lei 4/1987, do 27 de maio, de creación da Escola, modificada pola Lei 10/1989, do 10 de xullo, convócase a xornada A xustiza que vén, conforme as seguintes bases:
1. Obxectivos.
O principal obxectivo desta xornada é coñecer, pola natureza dos relatores, as liñas mestras do deseño da xustiza nos próximos anos, tanto na súa organización territorial como funcional, poñendo de manifesto as novidades que presenta a nova lexislación orgánica do poder xudicial e a súa incidencia na actividade de todos os profesionais implicados na xustiza.
2. Contidos.
Serán tratados, entre outros, os seguintes temas:
– Luces e sombras da xustiza.
– Poder xudicial e xustiza. Necesidades do presente. Posibilidades de futuro.
– O futuro da xustiza. Que opinan os profesionais?
3. Destinatarios.
Persoal ao servizo da Administración de Xustiza, notarios, rexistradores da propiedade e mercantís, avogados, procuradores, profesores e alumnos das universidades galegas e interesados en xeral.
4. Desenvolvemento.
Lugar: EGAP, rúa Madrid, 2-4, Santiago de Compostela.
Data: 30 de setembro de 2014.
Horario: mañá.
Duración: 5 horas lectivas.
5. Número de prazas.
Limitado pola capacidade do local.
6. Inscrición.
As persoas interesadas deberán formalizar a súa inscrición a través da área de matrícula da web da EGAP: https://egap.xunta.es/matricula/
O prazo para inscribirse estará aberto desde o día seguinte ao da publicación desta resolución no Diario Oficial de Galicia ata o 28 de setembro de 2014.
Poderá obterse calquera outra información, das 8.30 ás 14.30 horas, nos teléfonos: 981 54 62 41 e 981 54 62 39.
7. Modificacións.
A EGAP resérvase a facultade de interpretar e de resolver as incidencias que poidan xurdir no desenvolvemento desta xornada, así como a facultade de cancelala se o escaso número de solicitudes non xustificase a súa realización.
8. Certificado de asistencia oficial.
Ao final da xornada entregarase un certificado de asistencia a aquelas personas inscritas que participasen asiduamente e sempre que a súa asistencia fose igual ou superior ao 90 % das horas lectivas programadas. Neste documento aparecerán, de forma expresa, o contido, a carga lectiva, a data, o lugar de realización e o selo oficial da institución.
Santiago de Compostela, 8 de setembro de 2014
Sonia Rodríguez-Campos González
Directora da Escola Galega de Administración Pública