Dentro do programa anual de actividades para o ano 2014 da Academia Galega de Seguridade Pública (Agasp), aprobado polo Consello Rector deste organismo con data do 27 de decembro do ano 2013, e conscientes da importancia que ten establecer grupos de traballo con obxectivos comúns e fins iguais, convócase unha xornada de traballo e convivencia para xefes e mandos dos corpos da Policía Local de Galicia, conforme as seguintes bases:

Primeira. Obxectivos

Facilitar un espazo adecuado para realizar unha análise da situación actual da Policía Local de Galicia, reflexionar, debater e, sobre todo, buscar alternativas aos problemas existentes fomentando o intercambio de experiencias como base de posibles cambios de funcionamento e melloras.

Segunda. Destinatarios/as

Este curso está dirixido exclusivamente a xefes e mandos dos corpos de Policía Local dos concellos galegos que se atopen en situación de servizo activo ou en excedencia por coidado de familiares.

A baixa laboral por incapacidade temporal impide a participación nas accións formativas convocadas, polo que, de producirse esta situación, os/as interesados/as deberán comunicar tal situación ao Servizo de Formación en Seguridade Pública da Agasp, competente na materia de forma inmediata, en caso de non facelo, serán penalizados coa non participación nas accións formativas da Agasp nun ano contado desde o día seguinte ao que se teña coñecemento do feito e, no caso de estar realizando efectivamente un curso, non se emitirá ningún diploma (nin de asistencia, nin de aproveitamento).

Será revisable a admisión de persoas en baixa laboral por incapacidade temporal, cando a esta veña producida por accidente de traballo recoñecido como tal e a asistencia ao curso non interfira na súa recuperación.

Terceira. Desenvolvemento da actividade

Lugar: Academia Galega de Seguridade Pública.

Datas: 11 e 12 de decembro de 2014, en réxime de internado.

Horario: desde as 11.00 horas do día 11 de decembro ata as 14.00 horas do día 12 de decembro de 2014.

Número de prazas: ilimitado.

Cuarta. Solicitudes

1. O persoal que desexe participar nesta xornada deberá cubrir o formulario de matrícula telemática dispoñible na páxina web da Agasp (htpp://agasp.xunta.é), non se admitirá ningunha outra forma ou modelo de solicitude.

2. A falsidade ou ocultación de datos esenciais para a selección das persoas dará lugar á exclusión automática da xornada, así como á imposibilidade de participar en ningún outro curso durante o prazo dun ano computado desde o momento en que se detecte o feito.

3. O prazo de presentación de solicitudes será de 10 días naturais desde a publicación desta resolución no Diario Oficial de Galicia.

Quinta. Admisión

A Agasp publicará na súa páxina web a relación das persoas seleccionadas para participar na xornada, cunha antelación mínima de tres días naturais desde a data de inicio desta.

A renuncia non xustificada ou acreditación documental da causa que a produce suporá a exclusión da persoa seleccionada nos seguintes dez cursos que convoque o Servizo de Formación en Seguridade Pública da Agasp e nas que a persoa figurase como posible destinataria destas, sen contar edicións repetidas, cursos xa realizados e que polo menos teñan a mesma carga horaria, do curso polo que foi penalizada.

Sexta. Asistencia

1. Obligatoria.

2. O alumnado deberá asistir co uniforme regulamentario.

A Estrada, 18 de novembro de 2014

Luis Menor Pérez
Director xeral da Academia Galega de Seguridade Pública