De conformidade co establecido na norma 7.3 dos criterios de repartición do Fondo de Acción Social para o exercicio económico do ano 2013, relativos á axuda para a atención de persoas con discapacidade, aprobados polo Consello da Xunta de Galicia do 8 de maio de 2014 e publicados por Resolución da Dirección Xeral da Función Pública do 9 de maio de 2014 (DOG nº 92, do 15 de maio), o anuncio de exposición das listaxes definitivas de admitidos e excluídos publicarase no Diario Oficial de Galicia.
Dado que nas listaxes preceptivas figuran datos de carácter identificativo, de características persoais, económicos ou de saúde protexidos pola Lei orgánica 15/1999, do 13 de decembro, de protección de datos de carácter persoal, cuxa publicación pode lesionar o dereito constitucional á intimidade dos/as solicitantes ou dos/as causantes das axudas, cómpre realizar a publicación coas limitacións e reservas establecidas no artigo 61 da Lei 30/1992, do 26 de novembro, de réxime xurídico das administracións públicas e do procedemento administrativo común.
Dando cumprimento ao prescrito, esta dirección xeral, transcorrido o prazo de alegacións previsto no punto segundo da Resolución do 14 de outubro de 2014 (Diario Oficial de Galicia nº 200, do 20 de outubro) e unha vez concluídos os traballos de revisión das reclamacións presentadas,
RESOLVE:
Primeiro. Publicar no Diario Oficial de Galicia, como anexo a esta resolución, a distribución final da concesión das axudas do Fondo de Acción Social do exercicio económico do ano 2013.
Segundo. Facer públicas as listaxes definitivas de axudas aprobadas e denegadas dos criterios de repartición Fondo de Acción Social do exercicio económico 2013 relativos á axuda para a atención de persoas con discapacidade na páxina web da Dirección Xeral da Función Pública http://funcionpublica.xunta.es/?q=FAS
Para o coñecemento íntegro do acto as persoas solicitantes deberan introducir nos espazos habilitados para o efecto o NIF e mais o código de impresión da súa solicitude.
Terceiro. Contra a resolución as persoas interesadas poderán interpoñer recurso de alzada ante a conselleira de Facenda no prazo dun mes contado desde o día seguinte ao da data de publicación desta resolución no Diario Oficial de Galicia, de acordo co previsto nos artigos 114 e 115 da Lei 30/1992, do 26 de novembro, de réxime xurídico das administracións públicas e do procedemento administrativo común, modificada pola Lei 4/1999, do 13 de xaneiro.
Santiago de Compostela, 26 de novembro de 2014
José María Barreiro Díaz
Director xeral da Función Pública
ANEXO
Tipo de axuda |
Entradas |
Aprobadas |
Denegadas |
Importe euros |
1. Atención de persoas con discapacidade |
765 |
685 |
80 |
892.575,98 |