De conformidade co disposto no artigo 59.5 da Lei 30/1992, do 26 de novembro, de réxime xurídico das administracións públicas e do procedemento administrativo común, notifícase a Instituto Galego de Novas Profesións, S.L. a Resolución do 16 de decembro de 2014, da directora xeral de Emprego e Formación, ditada no procedemento de baixa no Rexistro de Centros e Entidades de Formación para o Emprego da Consellería de Traballo e Benestar, devolta polo servizo de Correos porque, intentada a notificación en dúas ocasións, non se puido efectuar.

«Número de censo: 36H00741.

Instituto Galego de Novas Profesións, S.L

Rúa Hernán Cortés, nº 26, entresollado

36203 Vigo

Pontevedra

Logo de examinar a inscrición/acreditación da entidade Instituto Galego de Novas Profesións, S.L., B36790889, no Rexistro de Centros e Entidades de Formación para o Emprego da Consellería de Traballo e Benestar,

Supostos de feito.

Primeiro. A entidade Instituto Galego de Novas Profesións, S.L. encóntrase inscrita no Rexistro de Centros e Entidades de Formación para o Emprego da Consellería de Traballo e Benestar, co número 36H00741, nas especialidades formativas seguintes:

Código especialidade	Descrición	Alta homologación
ADGC31	Xestión inmobiliaria	17.12.1998
ADGS20	Comercial de seguros	16.2.2000
ARGD30	Técnico auxiliar en deseño industrial	27.1.2006
ARGD40	Técnico auxiliar en deseño de interiores	27.1.2006
HOTF10	Azafata/auxiliar de congresos	16.2.2000
SSCF12	Deseño de medios didácticos	16.2.2000

Segundo. A Xefatura Territorial da Consellería de Traballo e Benestar de Vigo o 27 de outubro de 2014 requiriu a entidade Instituto Galego de Novas Profesións, S.L., para os efectos de comprobar o cumprimento dos requisitos establecidos na normativa vixente para manter a condición de centro/entidade inscrito ou acreditado no Rexistro de Centros e Entidades de Formación para o Emprego da Consellería de Traballo e Benestar, a documentación prevista nos artigos 5 e 6 do Decreto 106/2011 e informouna de que, en caso de non achegar a documentación requirida, se proporía a súa baixa no antedito rexistro.

Terceiro. O 29 de outubro de 2014 devolveuse a notificación do requirimento por resultar descoñecido o centro no enderezo da rúa Hernán Cortés, nº 26, entresollado, 36203 Vigo, Pontevedra.

Cuarto. O 25 de novembro de 2014 persoal técnico da Xefatura Territorial da Consellería de Traballo e Benestar de Vigo visitou o centro Instituto Galego de Novas Profesións, S.L. e comprobou que non existe o devandito centro na rúa Hernán Cortés, nº 26, entresollado, 36203 Vigo, Pontevedra.

Quinto. En cumprimento do disposto no artigo 8 do Decreto 106/2011, do 19 de maio, o 27 de novembro de 2014 a xefa territorial da Consellería de Traballo e Benestar de Vigo propón a baixa no Rexistro de Centros, Entidades de Formación do Instituto Galego de Novas Profesións, S.L., B36790889, con número de censo 36H00741, na rúa Hernán Cortés, nº 26, entresollado, 36203 Vigo, Pontevedra, coas especialidades correspondentes, por non existir o dito centro no enderezo sinalado.

Fundamentos de dereito.

Primeiro. A competencia para resolver este expediente corresponde á directora xeral de Emprego e Formación, de conformidade co establecido no artigo 6.3 e no artigo 8 do Decreto 106/2011, do 19 de maio.

Segundo. O artigo 8.1.a) do Decreto 106/2011, do 19 de maio, dispón que se poderá acordar a baixa no Rexistro de Centros e Entidades de Formación en caso de incumprimento de calquera das obrigas previstas no artigo 7 deste decreto.

Terceiro. O artigo 7.1.a) do Decreto 106/2011, do 19 de maio, dispón que os centros e entidades de formación teñen a obrigación de manter as instalacións e a estrutura de medios sobre a base das cales se produciu a súa inscrición e adaptalas aos requisitos mínimos que en cada momento se exixan para cada especialidade acreditada ou inscrita.

Revisado o expediente compróbase que Instituto Galego de Novas Profesións, S.L., non mantén as instalacións e a estrutura de medios sobre a base das cales se produciu a súa inscrición, na rúa Hernán Cortés, nº 26, entresollado, 36203 Vigo, Pontevedra.

Cuarto. Tendo en conta que na tramitación do expediente se observaron as normas que para o efecto se establecen no Decreto 106/2011, do 19 de maio, e na Lei de réxime xurídico das administracións públicas e do procedemento administrativo común.

Logo de ver o Real decreto 395/2007, do 23 de marzo, polo que se regula o subsistema de formación profesional para o emprego, a Orde TAS/718/2008, do 7 de marzo, modificada pola Orde ESS/1726/2012, do 2 de agosto, pola que se desenvolve o antedito real decreto, o Decreto 106/2011, do 19 de maio, polo que se crea o Rexistro de Centros e Entidades de Formación para o Emprego da Consellería de Traballo e Benestar e se regula o procedemento para a inscrición e, se é o caso, acreditación dos centros e entidades que impartan formación para o emprego no territorio da Comunidade Autónoma de Galicia, o Decreto 235/2012, do 5 de decembro, polo que se fixa a estrutura orgánica da Vicepresidencia e das consellerías da Xunta de Galicia, o Decreto 42/2013, do 21 de febreiro, polo que se establece a estrutura orgánica da Consellería de Traballo e Benestar, a Lei 30/1992, do 26 de novembro, de réxime xurídico das administracións públicas e do procedemento administrativo común, e a demais normativa de xeral aplicación,

RESOLVO:

Dar de baixa a entidade Instituto Galego de Novas Profesións, S.L., con número de censo 36H00741, no Rexistro de Centros e Entidades de Formación para o Emprego da Consellería de Traballo e Benestar.

Notifíquese aos interesados esta resolución para o seu coñecemento e efectos oportunos.

Contra esta resolución poderase interpoñer recurso de alzada ante a conselleira de Traballo e Benestar no termo dun mes contado desde a súa notificación, de acordo co establecido no artigo 114, seguintes e concordantes, da Lei 30/1992, do 26 de novembro, de réxime xurídico das administracións públicas e do procedemento administrativo común (modificada pola Lei 4/1999, do 13 de xaneiro)».

Santiago de Compostela, 17 de febreiro de 2015

Ana Mª Díaz López
Directora xeral de Emprego e Formación