No Diario Oficial de Galicia núm. 139, do 24 de xullo de 2015, publicouse a Resolución do 17 de xullo desta dirección pola que se concederon subvencións, en réxime de concorrencia competitiva, aos proxectos de aforro e eficiencia enerxética para a renovación das instalacións de iluminación pública exterior existentes (ILE) presentados polas entidades locais mencionadas no anexo da resolución.

De acordo co disposto no artigo 2 das bases reguladoras das axudas, o período de execución das actuacións subvencionadas estará comprendido entre o día 31 de marzo e o 15 de outubro de 2015 e, segundo o disposto no artigo 21.3 das mesmas bases, o período para as entidades locais beneficiarias presentaren a documentación xustificativa dos investimentos, rematará o 31 de outubro de 2015.

O artigo 45.3 do Decreto 11/2009, do 8 de xaneiro, polo que se aproba o Regulamento da Lei 9/2007, do 13 de xuño, de subvencións de Galicia (DOG núm. 20, do 29 de xaneiro), establece a posibilidade de que o órgano concedente das subvencións outorgue, salvo precepto en contra contido nas bases reguladoras, unha ampliación do prazo establecido para presentar a xustificación, que non excederá a metade deste e sempre que con iso non se prexudiquen dereitos de terceiros.

Doutra banda, remítese ao disposto con carácter xeral no artigo 49 da Lei 30/1992, do 26 de novembro, de réxime xurídico das administracións públicas e do procedemento administrativo común, publicada no Boletín Oficial del Estado núm. 285, do 27 de novembro. A ampliación poderase acordar de oficio ou por instancia de parte, antes do vencemento do prazo de que se trate e se as circunstancias así o aconsellan.

No presente procedemento de concesión de axudas estanse a rexistrar numerosas solicitudes de prórroga das entidades locais beneficiarias, motivadas nas dificultades existentes para executar e xustificar os investimentos subvencionados na referidas datas límite por cuestións orzamentarias, de procedemento de contratación das obras e de demora nas entregas de materiais polos provedores e ademais non existe a posibilidade de causar prexuízos a terceiros.

Por todo o anterior, sobre a base dos requisitos e condicións previstos na normativa anteriormente citada,

DISPOÑO:

Primeiro. Modificar as datas límite que figuran nos artigos 2 e 21.3 das bases reguladoras previstas, respectivamente, para a execución das actuacións e a xustificación dos investimentos, ampliando o período de execución das actuacións que se subvencionan ata o 31 de outubro de 2015 e o período para presentar a documentación xustificativa dos investimentos ata o 15 de novembro de 2015.

Segundo. Publicar esta resolución no Diario Oficial de Galicia e na páxina web do Instituto Enerxético de Galicia (www.inega.es), para os efectos previstos no artigo 59.6.b) Lei 30/1992, do 26 de novembro.

Terceiro. De acordo co disposto no artigo 49.3 da Lei 30/1992, do 26 de novembro, contra o presente acordo non cabe recurso de ningún tipo.

Santiago de Compostela, 17 de agosto de 2015

Ángel Bernardo Tahoces
Director do Instituto Enerxético de Galicia