O artigo 43 da Lei 5/2007, do 7 de maio, de emerxencias de Galicia, establece que o persoal do sistema integrado de protección civil e emerxencias de Galicia estará formado tanto por persoal de carácter profesional de servizos que realicen algunha actividade relacionada coa xestión de riscos e de emerxencias como por persoal voluntario de entidades ou organizacións públicas ou privadas sen ánimo de lucro que teñan como fin a protección de persoas, dos bens e do ambiente en situacións de xestión de riscos e de emerxencias. Segundo o artigo 44 da citada lei, este persoal organizarase en grupos operativos.

Por Resolución do 2 de agosto de 2010 publicouse o Plan territorial de emerxencias de Galicia (Platerga) onde se establece a estrutura de dirección e coordinación e as unidades organizativas para facer fronte dun xeito coordinado ás emerxencias que se poidan producir en Galicia: derivadas de riscos naturais, tecnolóxicos ou antrópicos.

Dentro das actividades programadas para o ano 2015, e conforme o establecido no artigo 46 da Lei 5/2007, do 7 de maio, de emerxencias de Galicia, e na Lei 1/2007, do 15 de xaneiro, da Academia Galega de Seguridade Pública (Agasp), anúnciase a convocatoria dunha xornada sobre accidentes con múltiples vítimas, conforme as seguintes bases:

Primeira. Datos da actividade

Tipo	Xornada
Denominación	Accidentes con múltiples vítimas
Modalidade	Presencial
Edicións	1
Horas lectivas	8
Prazas	Limitadas pola capacidade do local

Segunda. Obxectivos e contido

Obxectivos: posta en valor dos organismos encargados da atención de sinistros nos cales se prevé a existencia de múltiples vítimas.

Contido:

Módulo 1: Planificación da protección civil en Galicia (Dirección Xeral de Emerxencias e Interior).

• Planificación territorial: o Plan territorial de emerxencias de Galicia (Platerga).

– Contido e estrutura do Platerga: emerxencias consideradas.

– Niveis de activación.

• Planificación especial.

– Os plans para o risco de inundacións, incendios, risco químico.

– O Plan de emerxencia por accidente no transporte de mercadorías perigosas da Comunidade Autónoma de Galicia (Plan Transgal).

– Plans de emerxencia exterior (PEE): estado de implantación.

• Rexistro de plans de emerxencia.

– Decreto 171/2010, do 1 de octubre, sobre plans de autoprotección na Comunidade Autónoma de Galicia.

– Funcionamento das aplicacións: Rexistro de plans de autoprotección na Comunidade Autónoma de Galicia (Regape e Regape-Seveso).

Módulo 2: Axencia Galega de Emerxencias (Axega).

• Estrutura interna do Centro de Atención de Emerxencias (CAE 112 Galicia): operadores/as, enlace, coordinador/a de sala, técnica/o de garda).

• Funcionamento do CAE 112 en ordinario e na activación dun plan de protección civil.

• Programas: Asistencia Recíproca Interrexional en Emerxencias (ARIEM 112), aplicacións e proxectos relacionados.

• Grupo de apoio loxístico á intervención: medios dispoñibles e activación.

Módulo 3: Instituto de Medicina Legal de Galicia (Imelga).

• Protocolo nacional de actuación médico-forense e policía científica en sucesos con múltiples vítimas.

• Guía para a identificación de vítimas de catástrofes.

Módulo 4: Grupo de Intervención Psicolóxica en Catástrofes e Emerxencias (GIPCE).

• Grupo de Intervención Psicolóxica en Catástrofes e Emerxencias (GIPCE): integrantes e funcionamento.

• Obxectivos da intervención psicolóxica.

• Principios de actuación.

• Papel e función do/da psicólogo/a.

Terceira. Destinatarias/os

Persoal dos servizos de extinción de incendios e salvamento (bombeiras/os municipais e de consorcio), persoal dos corpos e forzas de seguridade, funcionarias/os da Dirección Xeral de Emerxencias e Interior, persoal dos servizos municipais e protección civil e emerxencias, persoal dos grupos de emerxencias supramunicipais (GES), persoal das agrupacións de voluntarios de protección civil (AVPC), funcionarias/os do Instituto de Medicina Legal de Galicia (Imelga) e persoal do Grupo de Intervención Psicolóxica en Catástrofes e Emerxencias (GIPCE).

Este persoal forma parte do sistema integrado de protección civil e emerxencias de Galicia (artigos 43 e 44 da Lei 5/2007, do 7 de maio, de emerxencias de Galicia).

Cuarta. Desenvolvemento da actividade

Lugar: Agasp (avda. da Cultura, s/n, A Estrada, Pontevedra).

Datas: 24 de novembro de 2015.

Uniformidade: é obrigatorio asistir ao curso co uniforme de traballo. As persoas que incumpran esta norma poderán ser dadas de baixa na actividade.

Quinta. Inscrición

a) O persoal que desexe participar na xornada convocada nesta resolución deberá cubrir o formulario de matrícula telemática dispoñible na páxina web da Agasp (http://agasp.xunta.es), non se admitirá ningunha outra forma ou modelo de solicitude.

É preciso que todas as persoas que desexen participar en cursos da Agasp manteñan actualizados os seus datos persoais, especialmente a conta de correo electrónico e o teléfono móbil, co obxecto de posibles comunicacións. No suposto de non ser correctos ou exactos os ditos datos, a Agasp non é responsable dos posibles prexuízos causados aos interesados.

b) As persoas que non sexan usuarias da páxina web da Agasp deberán previamente darse de alta nesta, para o que é necesario facilitar unha conta persoal de correo electrónico.

c) O prazo de inscrición é de 15 días naturais a partir do día seguinte ao da publicación desta resolución no Diario Oficial de Galicia.

Se o último día do prazo fose inhábil, entenderase prorrogado ao primeiro día hábil seguinte.

A inscrición poderá realizarse ata as 14.00 horas da data de finalización do prazo de presentación de solicitudes. No caso de que non haxa un suficiente número de solicitantes que reúnan os requisitos do curso, poderá completarse o alumnado asignado a este mediante a apertura dun novo prazo público de presentación de solicitudes na páxina web da Agasp, con suficiente antelación para que teña lugar unha adecuada selección das persoas candidatas.

d) En caso de dúbida, dificultades técnicas ou necesidade de máis información poderán dirixirse á Agasp a través dos números de teléfono: 886 20 61 12, 886 20 61 37 e 886 20 61 38, do fax: 886 20 61 23 ou do enderezo de correo electrónico: formacion.emerxencias.agasp@xunta.es, que adoptará as medidas necesarias para facilitar a presentación de solicitudes.

e) A falsidade ou ocultación de datos esenciais para a selección das persoas aspirantes dará lugar á exclusión automática do curso solicitado, así como á imposibilidade de participar en ningún outro curso durante o prazo dun ano computado desde o momento en que se detecte o feito.

f) Serán excluídas automaticamente aquelas solicitudes que non teñan cubertos correctamente todos os datos para realizar a selección do alumnado, non se axusten ao modelo normalizado ou sexan presentadas fóra de prazo.

g) Non está permitida a realización de cursos que teñan simultaneidade de horarios nunha ou varias sesións presenciais. Cando o alumnado teña coñecemento de que foi seleccionado para un curso que teña coincidencia horaria con outro no que xa foi seleccionado debe renunciar a un deles.

Sexta. Criterios de selección

6.1. Reservarase o 50 % das prazas para solicitantes mulleres que reúnan os requisitos establecidos na convocatoria, segundo o disposto no artigo 37.bis da Lei 7/2004, do 16 de xullo, galega para a igualdade de mulleres e homes. De non existir suficientes solicitudes de participación de mulleres, as prazas sobrantes acrecentarán as da quenda xeral.

6.2. Segundo a orde de presentación das solicitudes.

Sétima. Admisión

A Agasp publicará na súa páxina web http://agasp.xunta.es unha relación das persoas seleccionadas para participar en cada curso, así como un número adecuado de reservas, de acordo co disposto no artigo 59.6 da Lei de réxime xurídico das administracións públicas e do procedemento administrativo común.

Os/as alumnos/as seleccionados serán informados da súa selección a través do correo electrónico e tamén, para quen facilite un número de teléfono móbil, a través de mensaxe telefónica.

De acordo co establecido no artigo 21 do Regulamento de réxime interior da Agasp, as persoas que resulten seleccionadas teñen a obriga de participar no desenvolvemento da actividade, agás que comunicasen a súa imposibilidade de asistencia con polo menos 48 horas de antelación ao comezo desta. A devandita renuncia deberase comunicar por escrito á Agasp, por correo electrónico ao enderezo: formación.emerxencias.agasp@xunta.es ou por fax ao número: 886 20 61 23.

A Agasp resérvase o dereito de solicitar todos aqueles datos que considere necesarios para a adecuada realización da selección.

Oitava. Dereitos e deberes do alumnado

Durante o desenvolvemento da actividade ao alumnado seralle de aplicación, en canto aos dereitos e deberes, o previsto no Regulamento de réxime interior da Agasp, aprobado por Orde da Consellería de Presidencia, Administracións Públicas e Xustiza, do 4 de febreiro de 2009 (DOG núm. 30, do 12 de febreiro).

Novena. Faltas de asistencia

O Regulamento de réxime interior da Agasp, mencionado na base núm. 8 desta convocatoria, regula no seu artigo 16 as faltas de asistencia nos cursos:

«1. A asistencia ás clases e actividades comprendidas no programa do curso é obrigatoria. As faltas que as/os alumnas/os acumulen deberán xustificarse debidamente, penalizándose disciplinariamente, en caso contrario.

2. A/o alumna/o que, por enfermidade ou algunha outra causa xustificada, perda máis do 10 % das clases do curso de formación será declarado non apto, e poderá incorporarse ao curso seguinte ou cando a causa determinante llo permita.

De ser necesario, e só nos casos en que a inasistencia ás clases estivese motivada por accidente ou lesión sufridos con ocasión da actividade académica, o director xeral poderá considerar a conveniencia ou a oportunidade de permitirlle ao/á alumno/a poder recuperar ata un determinado número de horas e participar posteriormente nun exame extraordinario para poder superar o curso sen ter que repetilo.

3. No entanto, aínda que as ausencias acumuladas non chegasen á porcentaxe sinalada, a/o alumna/o poderá verse obrigado a recuperar todas ou parte das horas perdidas ao longo do curso. Neste caso a xefatura de ensino proporá ao director xeral o número de horas que se van recuperar, tendo en conta, en cada caso concreto, o tipo de xustificación presentada para cada ausencia, así como o número total destas e o comportamento e actitude da/o alumna/o ao longo do curso».

Décima. Certificado de asistencia

Ao finalizar a actividade entregaráselles un certificado de asistencia a aquelas persoas que acrediten a súa participación continuada.

Undécima. Financiamento da actividade

Esta actividade é cofinanciada nun 80 % polo Fondo Social Europeo dentro do Programa Operativo Fondo Social Europeo de Galicia 2007-2013, no eixe 3, tema prioritario 72.

Duodécima. Facultades da Agasp

A Agasp poderá modificar o desenvolvemento normal da actividade para adaptala ás necesidades da Administración e ás continxencias que poidan xurdir.

A Agasp tamén poderá suprimir as xornadas, ampliar novas edicións destas ou suspendelas temporalmente, cando así veña exixido por circunstancias que afecten á súa organización ou docencia.

A Estrada, 9 de outubro de 2015

Luis Menor Pérez
Director xeral da Academia Galega de Seguridade Pública