O Decreto 85/2012, do 16 de febreiro, polo que se modifica o Decreto 138/2008, do 22 de maio, polo que se regula a sinalización turística de Galicia e se aproba o Manual de sinalización turística de Galicia, establece na súa disposición derradeira primeira a facultade do titular da Consellería de Presidencia, Administracións Públicas e Xustiza para ditar as disposicións necesarias para o desenvolvemento deste decreto e, en concreto, para realizar as modificacións necesarias no Manual de sinalización turística de Galicia.
O Camiño de Santiago foi declarado en 1987 como primeiro itinerario cultural europeo polo Consello de Europa e, posteriormente, en 1993 o Camiño francés recibiu a distinción como patrimonio mundial, ampliada recentemente aos Camiños do Norte, que en Galicia afecta os chamados Camiño Norte e Camiño Primitivo.
O Camiño de Santiago é un itinerario de peregrinación cunha dilatada historia de máis de 1.200 anos que, na actualidade, está a experimentar unha importante revitalización. O pasado ano foron preto de 250.000 os peregrinos que percorreron máis de 100 km a pé ou 200 en bicicleta. Esta afluencia proxecta a imaxe de Galicia por todo o mundo e supón un importante recurso para a economía de Galicia.
En Galicia están declarados como Camiño de Santiago 1.320 km que discorren por máis de cen municipios.
Neste sentido, e dado que o Camiño de Santiago é un dos símbolos máis consolidados da imaxe de Galicia no exterior, resulta imprescindible unificar e harmonizar a sinalización do Camiño de Santiago, definindo e delimitando os seus elementos gráficos e diferentes aplicacións.
Consecuentemente con todo o anterior, vista a proposta formulada pola Axencia Turismo de Galicia, e logo do informe da Asesoría Xurídica, esta consellería, no exercicio das facultades conferidas polo artigo 34 da Lei 1/1983, do 22 de febreiro, de normas reguladoras da Xunta e da súa Presidencia,
DISPÓN:
Artigo único
Modifícase o Manual de sinalización turística de Galicia aprobado polo Decreto 85/2012, do 16 de febreiro, engadindo un apartado correspondente á imaxe e sinalética do Camiño de Santiago, que se insire como anexo I da presente orde.
Disposición transitoria
Os elementos e sinais xa existentes e que non se axusten ao disposto nesta orde deberán adaptarse ás súas prescricións no prazo de catro anos desde a súa entrada en vigor.
Disposición derradeira primeira
Facúltase a persoa titular da Dirección da Axencia Turismo de Galicia, no ámbito das súas competencias, para ditar as resolucións e as instrucións necesarias para o desenvolvemento e o cumprimento desta orde.
Disposición derradeira segunda
Esta orde entrará en vigor o día seguinte ao da súa publicación no Diario Oficial de Galicia.
Santiago de Compostela, 5 de novembro de 2015
Alfonso Rueda Valenzuela
Vicepresidente e conselleiro de Presidencia,
Administracións Públicas e Xustiza