Examinado o expediente presentado pola Escola Familiar Agraria A Cancela das Neves (Pontevedra), solicitando poder substituí-lo ciclo formativo de grao medio de xardinería (autorizado por Resolución do 17 de xuño de 1999 (DOG do 14 de xullo), polo ciclo formativo de grao medio de xestión administrativa.

Resultando que o expediente foi tramitado pola Delegación Provincial da Consellería de Educación e Ordenación Universitaria de Pontevedra, que o envía cos informes correspondentes.

Vistos a Lei 1/1990, do 3 de outubro (BOE do 4), de ordenación xeral do sistema educativo, Real decreto 1004/1991, do 14 de xuño (BOE do 26), polo que se establecen os requisitos mínimos dos centros que imparten ensinanzas de réxime xeral non universitarias; Real decreto 777/1998 (BOE do 8 de maio), polo que se desenvolven determinados aspectos da ordenación da formación profesional no ámbito do sistema educativo; Decreto 296/1999 (DOG do 18 de novembro), polo que se desenvolven determinados aspectos dos currículos dos ciclos formativos de formación profesional específica na Comunidade Autónoma de Galicia; Orde do 21 de decembro de 1999 (DOG do 31-1-2000), pola que se regulan determinados aspectos relativos á autorización de centros privados exclusivos de formación profesional específica, no ámbito da Comunidade Autónoma de Galicia; Decreto 133/1995, do 10 de maio (DOG do 22), sobre autorización de centros docentes privados para impartir ensinanzas de réxime xeral non universitarias,

e a Orde do 20 de setembro de 1995 (DOG do 15 de decembro), que desenvolve o antedito decreto.

Considerando que concorren no expediente os requisitos esixidos nas disposicións vixentes para poder acceder ó solicitado.

Esta consellería, por proposta da Dirección Xeral de Centros e Inspección Educativa,

DISPÓN:

Primeiro.-Autorizarlle á Escola Familiar Agraria A Cancela das Neves (Pontevedra), para poder imparti-lo ciclo formativo de grao medio de xestión administrativa da familia profesional de administración, en substitución do ciclo formativo de grao medio de xardinería da familia profesional de actividades agrarias, quedando a composición do centro como se especifica no anexo desta orde.

Segundo.-Para as ensinanzas que se autorizan, a Delegación Provincial da Consellería de Educación e Ordenación Universitaria, logo de informe da Inspección Educativa, aprobará expresamente a relación de persoal que imparta docencia no dito centro.

Terceiro.-Queda o centro obrigado ó cumplimento da lexislación vixente e a solicita-la oportuna revisión cando teña que modificarse calquera dos datos que sinala esta orde.

Disposición transitoria

Durante o curso 2000-2001 poderá impartir excepcionalmente o segundo curso do ciclo formativo de grao medio de xardinería, autorizado por Resolución do 17 de xuño de 1999 (DOG do 14 de xullo).

Contra esta orde, que esgota a vía administrativa, os interesados poderán interpoñer recurso potestativo de reposición perante o conselleiro de Educación e Ordenación Universitaria, no prazo dun mes, a partir do día seguinte ó da súa publicación no Diario Oficial de Galicia, segundo o disposto nos artigos 116 e 117 da Lei 4/1999 (BOE do 14 de xaneiro), de modificación da Lei 30/1992, de réxime xurídico das administracións públicas e do procedemento administrativo común, ou ben directamente o recurso contencioso-administrativo, no prazo de dous meses, perante o Tribunal Superior de Xustiza de Galicia.

Santiago de Compostela, 26 de setembro de 2000.

Celso Currás Fernández

Conselleiro de Educación e

Ordenación Universitaria

ANEXO

Provincia: Pontevedra.

Concello: As Neves.

Localidade: As Neves.

Enderezo: Tortoreos, s/n.

Código do centro: 36005671.

Denominación específica: Escola Familiar Agraria A Cancela.

Titular: Federación de Escuelas Familiares Agrarias.

Composición resultante:

Centro de formación profesional específica:

Familia profesional: administración.-1 ciclo formativo de grao medio de xestión administrativa (1 unidade para 20 alumnos).

Familia profesional: industrias alimentarias.-1 ciclo formativo de grao medio de panificación e repostería (1 unidade para 30 alumnos).

Formación profesional de segundo grao:-2º e 3º curso de FP2 da especialidade: goberno e administración de empresas comunitarias (2 unidades).