A Xunta Electoral de Galicia, na sesión do día 30 de setembro de 2012, prestou a súa aprobación á proposta elevada pola Comisión de Control Electoral e a distribución dos espazos gratuítos de propaganda electoral nos seus propios termos nos medios de comunicación de titularidade pública, autonómica e estatal.

– Autonómica: Televisión Galega e Radio Galega (artigo 29 da Lei 8/1985, do 13 de agosto, de eleccións ao Parlamento de Galicia).

– Estatal: Televisión Española en Galicia e Radio Nacional de España en Galicia (artigo 64 da Lei orgánica 5/1985, do 19 de xuño, de réxime electoral xeral).

O acordo adoptado ponse de manifesto na Secretaría da Xunta Electoral de Galicia, en horario de rexistro, para exame e consulta, ata as 17.00 horas do luns, día 1 de outubro de 2012.

Contra o acordo de distribución, os representantes xerais das entidades políticas concorrentes ás eleccións ao Parlamento de Galicia que se consideren afectadas poderán interpoñer recurso de alzada perante a Xunta Electoral Central, o cal deberá presentarse ante a Xunta Electoral de Galicia dentro do mesmo prazo, o correspondente ao da posta de manifesto do expediente, e tramitarase conforme o procedemento establecido no artigo 21 da Lei orgánica 5/1985, do 19 de xuño, de réxime electoral xeral, e na Instrución da Xunta Electoral Central 11/2007, do 27 de setembro.

O que se publica no Diario Oficial de Galicia en virtude do disposto no artigo 18.6 da Lei orgánica 5/1985, do 19 de xuño, de réxime electoral xeral.

A Coruña, 30 de setembro de 2012

Miguel Ángel Cadenas Sobreira
Presidente da Xunta Electoral de Galicia