Consonte a competencia exclusiva sobre o deporte recollida no artigo 27.22 do Estatuto de autonomía de Galicia, e segundo o establecido no seu desenvolvemento pola Lei 3/2012, do 2 de abril, do deporte de Galicia, corresponde á Administración autonómica, entre outras competencias, o outorgamento de distincións no ámbito deportivo (artigo 5.1 e).

O Complexo Náutico e Campo de Regatas de Verducido en Pontevedra é unha instalación deportiva de titularidade da Xunta de Galicia destinada á formación, preparación e especialización dos deportistas galegos da modalidade deportiva de piragüismo.

Pola súa parte, David Cal Figueroa é o mellor deportista olímpico español de todos os tempos, que atesoura cinco medallas en Xogos Olímpicos, así como numerosas medallas en campionatos do mundo e de Europa, sendo un referente mundial da elite competitiva na súa disciplina deportiva e tamén dos valores deportivos.

A teor destes méritos, merecedor do xusto recoñecemento á súa traxectoria e á súa achega ao deporte galego,

RESOLVO:

Conceder a denominación de Complexo Náutico e Campo de Regatas de Verducido-David Cal ao Complexo Náutico e Campo de Regatas de Verducido en Pontevedra, instalación deportiva de titularidade da Xunta de Galicia.

Esta orde entrará en vigor o día seguinte ao da súa publicación no Diario Oficial de Galicia.

Santiago de Compostela, 9 de xuño de 2015

José Ramón Lete Lasa
Secretario xeral para o Deporte