O Concello de Santiago de Compostela remite a modificación referida, subscrita pola arquitecta xefa da Sección de Planeamento, en que solicita a súa aprobación definitiva, conforme o artigo 85.7 da Lei 9/2002, de ordenación urbanística e protección do medio rural de Galicia.
Unha vez analizada a documentación remitida polo Concello e vista a proposta literal que nesta mesma data eleva a Secretaría Xeral de Ordenación do Territorio e Urbanismo, resulta:
I. Antecedentes.
1. O Concello de Santiago de Compostela conta cun Plan xeral de ordenación municipal aprobado definitivamente polas ordes da Consellería de Política Territorial, Obras Públicas e Transportes do 3.10.2007 (aprobación parcial) e 1.9.2008.
2. Co mesmo obxecto que esta modificación foron tramitadas outras dúas, nas cales non se outorgou a aprobación definitiva pola inexistencia de circunstancias que xustifiquen a diferenza de tratamento respecto doutros ámbitos de solo urbanizable non delimitado:
a) Modificación relativa ao incremento da densidade dos solos urbanizables non delimitados tipo A (Orde da CMATI do 14.7.2011).
b) Modificación no ámbito do SUND-03 A Torreira-Sarela, relativa ao incremento de densidade de 20 a 25 vivendas por hectárea (Orde da CMATI do 13.3.2013).
3. A Secretaría Xeral de Calidade e Avaliación Ambiental decidiu o 18.2.2014 non someter esta modificación ao procedemento de avaliación ambiental estratéxica. No marco das consultas, o Instituto de Estudos do Territorio emite informe o 28.2.2014 sobre que non se producirán efectos significativos sobre a paisaxe.
4. Constan informes municipais: xurídico previo á aprobación inicial do 14.3.2014 e da Secretaría Xeral do Pleno do 17.3.2014, favorables á aprobación inicial (artigo 85.1 da LOUG).
5. O Concello Pleno aprobou inicialmente a modificación o 27.3.2014. Foi sometida á información pública por dous meses (El Correo Gallego e La Voz de Galicia do 15.5.2014 e DOG do 19.5.2014). O acordo foi notificado aos concellos limítrofes de Ames, Boqueixón, Teo, Vedra, Trazo, Oroso, O Pino e Val do Dubra e á Delegación do Goberno. Foi presentada unha alegación, segundo certificado municipal do 14.8.2014.
6. Constan informes sectoriais sen obxeccións nin observacións do Ministerio de Defensa do 8.2.2015 e de Augas de Galicia do 12.9.2014.
7. Constan informes da Área Técnica de Desenvolvemento Urbano e Sustentable e da Sección de Xestión Urbanística, do 19.1.2015, que propoñen a aprobación provisional.
8. A modificación foi aprobada provisionalmente polo Concello Pleno o 30.1.2015.
II. Análise e consideracións.
1. A modificación ten por obxecto modificar os artigos 79.4, 79.2 e 80.33 da normativa do PXOM de Santiago, para aumentar a densidade residencial máxima de 20 a 25 vivendas por hectárea nos ámbitos do SUND tipos A e B, de 12 a 16 viv./ha nos ámbitos do SUND tipo C e modificar a composición e os usos permitidos no ámbito do SUND tipo F, reducindo a proporción de edificabilidade residencial do 85 % ao 60 %.
2. As razóns de interese público da modificación consisten en facilitar a implantación de vivendas de protección oficial mediante a adaptación da superficie das vivendas resultantes da ordenación ás superficies derivadas das normas sobre vivendas protexidas, o que encaixa dentro das razóns precisas segundo o artigo 94.1 da LOUG.
3. A modificación afecta a totalidade dos solos urbanizables non delimitados residenciais, cumprindo as obxeccións das ordes da CMATI do 14.7.2011 e do 13.3.2013.
4. A modificación non incrementa a superficie edificable prevista no plan xeral vixente, polo que incide no cumprimento dos límites de edificabilidade e dotacións urbanísticas en relación coas determinacións establecidas ao respecto nos artigos 46 e 47.1 da LOUG.
A competencia para resolver sobre a aprobación definitiva do planeamento xeral correspóndelle ao conselleiro de Medio Ambiente, Territorio e Infraestruturas, de conformidade co disposto nos artigos 89 e 93.4 da LOUG e no artigo 1 do Decreto 44/2012, do 19 de xaneiro, polo que se establece a estrutura orgánica da CMATI.
III. Resolución.
En consecuencia, e visto o que antecede,
RESOLVO:
Primeiro. Outorgar a aprobación definitiva á modificación puntual do PXOM de Santiago de Compostela relativa ao incremento de densidade dos solos urbanizables non delimitados.
Segundo. De conformidade co disposto polos artigos 92 da Lei 9/2002 e 70 da Lei 7/1985, do 2 de abril, reguladora das bases de réxime local, o Concello deberá publicar no BOP a normativa e as ordenanzas do PXOM aprobado definitivamente.
Terceiro. Notifíquese esta orde ao Concello e publíquese no Diario Oficial de Galicia.
Cuarto. Contra esta orde cabe interpor recurso contencioso-administrativo ante a sala correspondente do Tribunal Superior de Xustiza de Galicia, no prazo de dous meses, que se contarán desde o día seguinte ao da súa publicación, segundo dispoñen os artigos 10 e 46 da Lei 29/1998, do 13 de xullo, reguladora da xurisdición contencioso-administrativa.
Santiago de Compostela, 25 de maio de 2015
Ethel Mª Vázquez Mourelle
Conselleira de Medio Ambiente, Territorio e Infraestruturas