Na Comunicación COM (2009) 103, do 3 de marzo de 2009, da Comisión, ao Consello e ao Parlamento «Mellorar o acceso das zonas rurais ás modernas tecnoloxías da información e a comunicación (TIC)», a Comisión recoñece que a utilización eficaz das tecnoloxías da información e da comunicación, impulsada por un mellor acceso á internet de alta velocidade (banda larga), desempeña un papel fundamental para aumentar a produtividade e promover a innovación en Europa e, en particular, nas zonas rurais.
Neste contexto, a Comisión anima os Estados membros a impulsar as sinerxías e a complementariedade entre os instrumentos da política rexional, a política de desenvolvemento rural e as políticas nacionais en materia de TIC, para superar os desequilibrios territoriais no relativo ao acceso á banda larga, máis acusados nas zonas rurais.
Especificamente, no ámbito do fondo Feader, considérase prioritario desenvolver o acceso á internet de banda larga nas zonas rurais, que adoitan ter un acceso insuficiente debido ás dificultades orográficas e á dispersión poboacional. Por iso, o Regulamento (CE) nº 473/2009, do 25 de maio, polo que se modifica o Regulamento 1698/2005, relativo á axuda ao desenvolvemento rural a través do Fondo Europeo Agrícola de Desenvolvemento Rural (Feader), prevé expresamente a subvencionabilidade no marco da medida 321, «Servizos básicos para a economía e poboación rurais», das operacións de apoio á creación de infraestruturas de banda larga, que inclúe as instalacións por satélite, así como o acceso a estas.
Pola súa banda, no contexto máis amplo da Estratexia de Lisboa, os Estados membros están a impulsar plans para acelerar o desenvolvemento das TIC e, especificamente, incrementar o grao de penetración da banda larga mediante o despregamento das correspondentes infraestruturas. No caso da Comunidade Autónoma de Galicia, o Consello da Xunta de Galicia do día 18 de febreiro de 2010 aprobou o Plan director de banda larga 2010-2013 (PDBL), no cal se define a estratexia global para posibilitar o acceso ao servizo de banda larga a toda a sociedade galega como un dos motores principais para o desenvolvemento de Galicia, situándoa entre as rexións de referencia no desenvolvemento das novas tecnoloxías e infraestruturas para a sociedade da información.
No marco do PDBL, a Axencia para a Modernización Tecnolóxica de Galicia –entidade instrumental pertencente ao sector público autonómico á cal compete o impulso e promoción do PDBL, e que en virtude do Decreto 255/2011, do 15 de decembro, asumiu os medios persoais e materias e as competencias que lle correspondían á Secretaría Xeral de Modernización e Innovación Tecnolóxica– e a Agader, subscribiron o 17 de abril de 2012 un convenio de colaboración para coordinar as actuacións no ámbito do Plan de banda larga de Galicia, que se concreta, entre outras actuacións, na tramitación dunha convocatoria pública de subvencións, co obxectivo de completar a cobertura dos servizos de banda larga á práctica totalidade da poboación con tecnoloxía satélite de calidade segundo se dispón no propio PDBL. A vixencia da dita convocatoria comprende o período 2012-2014, ambos incluídos.
Nas directrices comunitarias para a aplicación das normas sobre axudas estatais ao despregamento rápido de redes de banda larga, a Comisión Europea mantén que unha intervención estatal selectiva no ámbito da banda larga pode contribuír a reducir a «fenda dixital» que se abre entre zonas nas cales se dispón de servizos de banda larga accesibles e competitivos e as zonas que carecen dos ditos servizos. A licitación aberta garante a transparencia a todos os investidores que desexen presentar ofertas para a realización do proxecto subvencionado.
Por outra banda, a Xunta de Galicia prevé dentro dos seus eixes de actuación o impulso á modernización e á innovación tecnolóxica co obxecto de potenciar a mellora da calidade do servizo ofrecido aos cidadáns. Por esta razón, cómpre artellar o dereito dos cidadáns a relacionarse coas administracións públicas por medios electrónicos e a utilizar as tecnoloxías da información na actividade administrativa, nos termos previstos na Lei 11/2007, do 22 de xuño, de acceso electrónico dos cidadáns aos servizos públicos, e no Decreto 198/2010, do 2 de decembro, polo que se regula o desenvolvemento da Administración electrónica na Xunta de Galicia e nas entidades dela dependentes.
Non apreciándose cambios substanciais no mercado de conexión ao servizo de acceso á banda larga vía satélite respecto á convocatoria do ano 2013, mantéñense sen modificacións tanto as bases reguladoras das subvencións como as bases reguladoras para seleccionar as entidades colaboradoras que foron aprobadas mediante Resolución do 29 de abril de 2013 pola que se establecen as bases reguladoras para a concesión de subvencións en réxime de concorrencia non competitiva para garantir o acceso á internet de banda larga vía satélite, se regula a selección de entidades colaboradoras que participarán na súa xestión, cofinanciadas co Fondo Europeo Agrícola de Desenvolvemento Rural (Feader) no marco do PDR de Galicia 2007-2013, e se convocan para o ano 2013 (DOG nº 89, do 10 de maio).
Tendo en conta o anterior, e no marco das competencias delegadas polo acordo do Consello de Dirección da Agader do 11 de xullo de 2013 (DOG nº 148, do 5 de agosto),
RESOLVO:
Primeiro. Obxecto
A presente resolución ten por obxecto:
a) Convocar para o ano 2014, en réxime de concorrencia non competitiva, as subvencións para garantir o acceso á internet de banda larga a través de tecnoloxía satélite bidireccional no medio rural, así como para a selección de entidades colaboradoras que participarán na súa xestión, de acordo coas bases reguladoras establecidas mediante Resolución do 29 de abril de 2013 (DOG nº 89, do 10 de maio. Corrección de erros, DOG nº 95, do 21 de maio).
b) Aprobar os formularios para xestionar esta convocatoria, que se xuntan a esta resolución como anexo I, para solicitantes de axuda, e como anexos II e III para entidades colaboradoras.
Segundo. Financiamento
A dotación máxima para financiar esta convocatoria é de trescentos cincuenta e nove mil euros (359.000 €), con cargo ás aplicacións orzamentarias 2014-12-A1-712A-7800 e 2014-12-A1-712A-7700, coa seguinte distribución:
|
Aplicación |
Proxecto de investimento |
Importe |
|
12.A1.712A.770.0 |
201400007 |
15.000,00 |
|
12.A1.712A.780.0 |
201400007 |
344.000,00 |
Este crédito está cofinanciado nun 75 % polo Fondo Europeo Agrícola de Desenvolvemento Rural (Feader) no marco da medida 321 do eixe 3 «Mellora da calidade de vida nas zonas rurais e diversificación da economía rural», do Programa de desenvolvemento rural de Galicia 2007-2013.
Terceiro. Tipo da axuda
Estas axudas, se é o caso, están amparadas no Regulamento (UE) 1407/2013 da Comisión, do 18 de decembro de 2013, relativo á aplicación dos artigos 107 e 108 do Tratado de Funcionamento da Unión Europea e as axudas de minimis (DOUE L 352, do 24 de decembro de 2013), e mais no Regulamento (UE) nº 1408/3013 da Comisión, do 18 de decembro de 2013, relativo á aplicación dos artigos 107 e 108 do Tratado de Funcionamento da Unión Europea ás axudas de minimis no sector da agricultura.
Cuarto. Requisitos para solicitar a subvención
a) Beneficiarios.
1º. As actuacións deberán levarse a cabo no territorio de Galicia, exceptuando as zonas incluídas nos perímetros urbanos definidos como tales no planeamento urbanístico vixente das cidades de Ferrol, Lugo, Ourense, Pontevedra, Santiago de Compostela, A Coruña e Vigo.
2º. Os beneficiarios (persoas físicas ou pemes) deberán, ademais, reunir as seguintes condicións:
– Residir na Comunidade Autónoma de Galicia.
– Non dispoñer de cobertura de banda larga de calidade de, polo menos, 2Mbps en sentido rede-usuario mediante outra tecnoloxía.
– Solicitar a axuda para a instalación da nova conexión no enderezo de residencia ou, no caso dunha empresa, domicilio fiscal.
– Manter o novo contrato de conexión á internet por un período mínimo de doce meses, contado desde a data de alta no servizo.
– Non ter sido beneficiario doutra subvención para o mesmo obxecto.
– Tramitar a solicitude exclusivamente a través de calquera das entidades colaboradoras que sexan seleccionadas por Agader en procedemento público e aberto.
3º. Non poderán obter a condición de beneficiario aqueles nos cales concorra algunha das circunstancias previstas no artigo 10 da Lei 9/2007. A acreditación de non estar incursos nas ditas prohibicións realizarase mediante declaración responsable do interesado, con independencia das comprobacións que efectúe o órgano xestor.
4º. Igualmente, non poderán ser beneficiarias das axudas as empresas exceptuadas do ámbito de aplicación do Regulamento (UE) nº 1407/3013 da Comisión, do 18 de decembro de 2013, relativo á aplicación dos artigos 107 e 108 do Tratado de Funcionamento da Unión Europea ás axudas de minimis, e mais do Regulamento (UE) nº 1408/3013 da Comisión, do 18 de decembro de 2013, relativo á aplicación dos artigos 107 e 108 do Tratado de Funcionamento da Unión Europea ás axudas de minimis no sector da agricultura.
b) Entidades colaboradoras.
1º. Poderán obter a condición de entidades colaboradoras, nos termos previstos no artigo 9 da Lei 9/2007, de subvencións de Galicia, as empresas privadas con personalidade xurídica propia, validamente constituídas e empresarios individuais. En ambos os casos, deben ter a condición de operadores de telecomunicacións, que oferten servizos da internet na Comunidade Autónoma de Galicia coas características técnicas especificadas no artigo 4 das bases reguladoras (Resolución do 29 de abril de 2013. DOG nº 89, do 10 de maio. Corrección de erros, DOG nº 95, do 21 de maio), e acreditar os seguintes requisitos:
1. Identificación da situación censual de alta da entidade colaboradora nunha epígrafe do imposto de actividades económicas relacionada co desenvolvemento do tipo de actividades recollidas nesta resolución.
2. Ser operador de telecomunicacións e estar dado de alta no rexistro público de operadores da Comisión do Mercado das Telecomunicacións (CMT).
3. Ofrecer servizos de conexión á internet de banda larga a través de satélite ao público en xeral.
4. Existencia de sede e/ou puntos de venda ao público na Comunidade Autónoma de Galicia, onde se poidan desenvolver as actividades recollidas neste réxime de axudas.
5. Dispoñibilidade e emprego de certificado electrónico de usuario así como de sinatura electrónica avanzada por parte do representante legal da entidade e por parte do interlocutor único que designe a entidade colaboradora.
2º. Non poderán obter a condición de entidades colaboradoras aquelas en que concorra algunha das circunstancias previstas no artigo 10.2 da Lei 9/2007, de subvencións de Galicia. Esta circunstancia acreditarase mediante a oportuna declaración responsable contida no anexo II.
Quinto. Presentación de solicitudes e documentación
a) Beneficiarios (procedemento MR704B).
1º. As subvencións xestionaranse a través de entidades colaboradoras, que terán como labor a promoción e contratación do servizo da internet actuando como canle entre os beneficiarios solicitantes e a Agader, de acordo co previsto na Resolución do 29 de abril de 2013 (DOG nº 89, do 10 de maio).
2º. Os beneficiarios terán completa liberdade para elixir o operador que prefiran de entre os que obtivesen o recoñecemento de entidade colaboradora, conforme o previsto na citada resolución.
3º. Para ser beneficiario o interesado deberá presentar a súa solicitude exclusivamente a través de calquera das entidades colaboradoras que sexan seleccionadas para este réxime de axudas, mediante solicitude presencial. Para tal efecto, os interesados cubrirán o formulario de solicitude que lles facilitará a entidade colaboradora.
A solicitude recolle a autorización expresa para comprobar a veracidade do seu documento nacional de identidade, salvo denegación expresa do interesado, nos termos previstos na Orde do 12 de xaneiro de 2012, pola que se regula a habilitación de procedementos administrativos e servizos na Administración xeral e no sector público autonómico de Galicia.
O formulario de solicitude incorpora as declaracións responsables dos solicitantes de non ter solicitado e/ou percibido axuda para o mesmo obxecto e, de ser o caso, das axudas de minimis solicitadas e/ou percibidas nos tres últimos exercicios fiscais.
4º. Unha vez que a entidade colaboradora dispón do formulario asinado polo interesado, tramitará a solicitude normalizada que figura como anexo I. A presentación das solicitudes realizarase unicamente por medios electrónicos a través do formulario normalizado accesible na sede electrónica da Xunta de Galicia, https://sede.xunta.es, de conformidade co establecido nos artigos 27.6 da Lei 11/2007, do 22 de xuño, de acceso dos cidadáns aos servizos públicos, e 24.2 do Decreto 198/2010, do 2 de decembro, polo que se regula o desenvolvemento da Administración electrónica na Xunta de Galicia e nas entidades dela dependentes. Para a presentación das solicitudes será necesario o documento nacional de identidade electrónico ou calquera dos certificados electrónicos recoñecidos pola sede da Xunta de Galicia. Coa presentación da solicitude a través da sede electrónica obterase un xustificante de entrada no Rexistro Electrónico da Xunta de Galicia.
A Agader poderá requirir en calquera momento ás entidades colaboradoras a remisión do formulario asinado polos solicitantes para os efectos de realizar as comprobacións que procedan.
5º. Ademais, as entidades colaboradoras efectuarán as declaracións responsables que figuran no anexo II facendo constar:
– Que na data da presentación da solicitude de axuda non se ten iniciado a execución da actuación subvencionable.
– Datos e características do servizo de conexión á internet que se pretende contratar, en concreto: velocidade nominal de conexión, límite de descarga mensual a partir do cal se reduce a velocidade da conexión e, de ser o caso, servizos adicionais que se prevé contratar.
b) Entidades colaboradoras (procedemento MR704A).
1º. As entidades colaboradoras seleccionadas ao abeiro da Resolución do 29 de abril de 2013 (DOG nº 89, do 10 de maio) e recollidas nas resolucións do 16 de xullo e do 13 de setembro de 2013 (DOG nº 140, do 24 de xullo, e DOG nº 185, do 27 de setembro) continúan tendo a cualidade de entidades colaboradoras, segundo o convenio subscrito con cada unha delas, polo que non necesitan presentar solicitude ningunha.
2º. Para as novas entidades que desexen obter a condición de entidade colaboradora, abrirase un prazo inicial de presentación de solicitudes dun mes natural a partir do seguinte ao da publicación desta resolución no DOG.
3º. Sen prexuízo do anterior, unha vez finalizado o referido prazo dun mes e co fin de ofrecer a posibilidade de adherirse ao convenio a todas as entidades que se constitúan ou estean en condicións de cumprir os requisitos exixidos con posterioridade ao dito prazo inicial, admitiranse solicitudes de obtención da cualidade de entidade colaboradora en calquera momento dentro do período de vixencia da presente resolución.
4º. A presentación das solicitudes realizarase unicamente por medios electrónicos a través do formulario normalizado accesible na sede electrónica da Xunta de Galicia, https://sede.xunta.es, de conformidade co establecido nos artigos 27.6 da Lei 11/2007, do 22 de xuño, de acceso dos cidadáns aos servizos públicos, e 24.2 do Decreto 198/2010, do 2 de decembro, polo que se regula o desenvolvemento da Administración electrónica na Xunta de Galicia e nas entidades dela dependentes. Para a presentación das solicitudes será necesario o documento nacional de identidade electrónico ou calquera dos certificados electrónicos recoñecidos pola sede da Xunta de Galicia.
5º. As solicitudes deberán conter a seguinte documentación:
1. Formulario normalizado de solicitude, declaracións responsables e autorizacións que figuran no anexo II, obtido e cuberto a través da aplicación informática que se habilitará, debidamente asinados polo/s representante/s legal/is da entidade colaboradora.
2. Documentación técnica adicional:
2.1. Certificado ou documentación acreditativa de inscrición no Rexistro de Operadores da Comisión do Mercado das Telecomunicacións.
2.2. Memoria na cal se indique:
– Descrición detallada das condicións económicas e as características dos servizos de acceso á internet vía satélite prestados polo solicitante á marxe das axudas reguladas nesta convocatoria, así como dos servizos que propón prestar ao abeiro da convocatoria e, de ser o caso, doutros servizos asociados á conexión vía satélite que poida prestar (servizos de telefonía, servizos de mantemento, servizos de valor engadido, etc.).
– Relación de medios humanos e materiais de que dispón para a colaboración na xestión das axudas.
– Descrición do procedemento para a recepción de solicitudes por parte dos interesados.
– Número de teléfono gratuíto de atención aos solicitantes.
– Enderezo da web que se empregará para facilitar información sobre as axudas aos interesados.
– Enderezo completo e datos de contacto dos seus puntos de venda ao público na Comunidade Autónoma de Galicia. No caso de que a actividade da entidade non comprenda todo o territorio galego, deberá indicar o ámbito xeográfico no cal prestará o servizo.
– Descrición detallada dos equipamentos de usuario que se propón empregar.
– Descrición detallada das características do satélite ou constelación de satélites que proporcionarán os servizos.
2.3. Plan de divulgación e comunicación, nos termos previstos no artigo 6 do anexo II da Resolución do 29 de abril de 2013 (DOG nº 89, do 10 de maio. Corrección de erros, DOG nº 95, do 21 de maio).
3. Documentación xurídico-administrativa:
3.1. Documentación acreditativa da constitución da empresa (escritura de constitución e estatutos inscritos no rexistro público que corresponda)
3.2. De ser o caso, documento/s público/s acreditativo/s do poder co que actúa o representante legal.
3.3. NIF da entidade colaboradora.
3.4. Modelo de contrato de prestación de servizos que subscribirá cos clientes.
A presentación da solicitude de obtención da calidade de entidade colaboradora implica a autorización da entidade colaboradora para que a Agader obteña directamente a documentación relacionada no punto 3.3 deste número 3, salvo denegación expresa da entidade, nos termos previstos na Orde do 12 de xaneiro de 2012 pola que se regula a habilitación de procedementos administrativos e servizos na Administración xeral e no sector público autonómico de Galicia.
4. De non ser a mesma persoa o representante legal e o interlocutor único da entidade colaboradora para os efectos de tramitación do expediente, terán que presentar o anexo III.
Sexto. Prazo para presentar as solicitudes e a documentación xustificativa
a) As empresas colaboradoras seleccionadas ao abeiro da Resolución do 29 de abril de 2013 (DOG nº 89, do 10 de maio) e recollidas nas resolucións do 16 de xullo e do 13 de setembro de 2013 (DOG nº 140, do 24 de xullo, e DOG nº 185, do 27 de setembro) continúan tendo a calidade de entidades colaboradoras, segundo o convenio subscrito con cada unha delas, e o prazo de presentación de solicitudes a través delas comezará ao día seguinte da entrada en vigor da presente convocatoria.
b) O prazo inicial para que novas entidades presenten as solicitudes para a obtención da calidade de entidades colaboradoras é dun mes contado desde o día seguinte ao da publicación da presente resolución no DOG, sen prexuízo do disposto no artigo 7.b) das bases reguladoras recollidas no anexo II da Resolución do 29 de abril de 2013 (DOG nº 89, do 10 de maio).
O prazo para presentar as solicitudes de axuda a través destas novas entidades colaboradoras comezará o día seguinte ao da publicación no DOG da relación de entidades colaboradoras adheridas.
c) O prazo de presentación de solicitudes de axuda a través das entidades colaboradoras remata o 30 de agosto de 2014.
d) O prazo para que as entidades colaboradoras presenten a documentación xustificativa dos gastos subvencionados remata o 31 de outubro de 2014.
Sétimo. Órganos competentes para a instrución e resolución do procedemento
A instrución de ambos os procedementos corresponde á Subdirección de Planificación e Dinamización do Medio Rural. O órgano competente para a resolución das subvencións e do procedemento de selección das solicitudes de obtención da calidade de entidade colaboradora é o director xeral da Agader (artigos 11 e 12 do anexo I, e artigos 9 e 10 do anexo II da Resolución do 29 de abril de 2013 (DOG nº 89, do 10 de maio. Corrección de erros, DOG nº 95, do 21 de maio).
Oitavo. Prazo para resolver e notificar a concesión da subvención
O prazo para resolver e notificar a resolución de concesión das subvencións será dun (1) mes contado desde o día seguinte a aquel en que se presentou a solicitude; transcorrido o dito prazo sen que se dite resolución expresa, os solicitantes poderán entender desestimadas as súas solicitudes.
O prazo máximo para resolver e notificar ás entidades interesadas en obter a condición de entidades colaboradoras será de dous (2) meses contados desde o día seguinte a aquel en que remate o prazo para presentación das solicitudes e, no caso previsto no artigo 7.b) das bases reguladoras, ao de presentación da solicitude de obtención da calidade de entidade colaboradora. Se transcorre o prazo máximo sen que se dite resolución expresa, os interesados poderán entender desestimadas as súas solicitudes por silencio administrativo.
Noveno. Medios de notificación
As resolucións serán notificadas electronicamente de acordo co establecido no artigo 26 do Decreto 198/2010, se consta a aceptación pola entidade colaboradora ou, no seu defecto, nos termos do artigo 58 da Lei 30/1992, do 26 de novembro. Así mesmo, a relación de entidades colaboradoras seleccionadas será publicada no Diario Oficial de Galicia e na páxina web da Agader.
Nas notificacións indicarase de modo expreso que a subvención é concedida en virtude dun programa cofinanciado polo Feader, e o eixe do PDR de Galicia no cal se enmarca o proxecto.
Cando proceda, a resolución recollerá expresamente que o importe da axuda concedida ten carácter de minimis, de acordo co Regulamento (UE) nº 1407/3013 da Comisión, do 18 de decembro de 2013, relativo á aplicación dos artigos 107 e 108 do Tratado de Funcionamento da Unión Europea ás axudas de minimis, e mais co Regulamento (UE) nº 1408/3013 da Comisión, do 18 de decembro de 2013, relativo á aplicación dos artigos 107 e 108 do Tratado de Funcionamento da Unión Europea ás axudas de minimis no sector da agricultura.
Décimo. Documentación xustificativa para o pagamento
a) Habilitarase un mecanismo de presentación telemática da xustificación das axudas que facilite tamén a presentación agrupada dos proxectos, e que será de uso obrigatorio para as entidades colaboradoras.
b) A entidade colaboradora disporá do prazo de 2 meses contados desde a aprobación da solicitude de axuda para presentar a primeira factura e demais documentación xustificativa correspondente á solicitude aprobada. En todo caso, o prazo límite de xustificación rematará o 31 de outubro de 2014.
Defínese, para o ámbito desta convocatoria de axudas, o termo «Primeira factura» como a factura que a entidade colaboradora emitirá ao beneficiario na cal se incluirán todos os gastos que pretendan presentarse como subvencionables ante a Agader, co fin de diferenciar esta factura de todas as facturas mensuais que a colaboradora emita ao beneficiario en concepto de cota mensual pola prestación do servizo. Sen prexuízo disto, esta primeira factura poderá conter tamén a cota de alta, de ser o caso, e a primeira cota mensual, que deben ser asumidas, en todo caso, pola entidade colaboradora, así como a facturación doutros conceptos que non sexan obxectos da presente subvención.
Na primeira factura, a entidade colaboradora aplicará ao beneficiario un desconto equivalente ao importe da subvención (ata un máximo de 150 euros), debendo figurar na factura un concepto independente polo referido importe co texto «Subvención Agader-PDR de Galicia 2007-2013, cofinanciada con Feader: conexión internet satélite».
Co fin de que a entidade colaboradora poida recuperar o importe descontado na factura ao beneficiario, este deberá ceder os dereitos de cobramento da axuda á entidade colaboradora, tal e como prevé o artigo 42.3 do Regulamento de subvencións da Comunidade Autónoma, aprobado por Decreto 11/2009, do 8 de xaneiro, autorización que consta no formulario de solicitude de axuda.
c) Co fin de que a Agader tramite o aboamento da axuda ás entidades colaboradoras, deberán presentar a seguinte documentación:
1º. Certificación da entidade colaboradora das conexións dadas de alta, cunha relación detallada por beneficiario en que se inclúan os seguintes datos:
– Código de expediente.
– Do número, importe e data da primeira factura.
2º. Certificado asinado polo instalador de ter realizado a instalación e comprobado o correcto funcionamento do servizo contratado por cada beneficiario.
3º. Copia en soporte informático, en formato PDF ou calquera outro que se indique no convenio, da primeira factura emitida a cada beneficiario e, cando proceda, do xustificante acreditativo do ingreso polos beneficiarios do importe que se vai aboar da primeira factura.
4º. Solicitude de pagamento da subvención pola entidade colaboradora, segundo modelo que facilitará a Agader.
5º. Copia do contrato asinado entre a colaboradora e o beneficiario.
d) A Agader poderá solicitar da entidade colaboradora ou do beneficiario calquera información complementaria que poida considerar para comprobar a adecuada xustificación material e formal da execución da actuación.
e) Comprobada a documentación e o proceso, se procede, a Agader realizará periodicamente propostas de pagamento polo total da subvención concedida para reintegrar ás entidades colaboradoras os importes das axudas anticipadas por estas.
Estas contías que ingresará a Agader mediante transferencia bancaria ás entidades colaboradoras non supoñen ningún tipo de subvención ás devanditas entidades, senón que é unha subvención aos beneficiarios finais.
f) Dado o importe máximo das subvencións, para o pagamento das axudas aprobadas por parte da Agader ás entidades colaboradoras, en referencia á acreditación por parte dos beneficiarios de atoparse ao día das obrigas coa Facenda Pública do Estado e da Administración Autónoma, así como coa Seguridade Social, observarase o disposto no artigo 55 da Lei 2/2013, do 27 de febreiro, de orzamentos xerais da Comunidade Autónoma de Galicia para o ano 2013. Polo tanto, poderase substituír a certificación de acreditación pola declaración responsable do solicitante de estar ao día no cumprimento das obrigas mencionadas.
Décimo primeiro. Réxime de recursos
Contra esta resolución, que pon fin á vía administrativa, cabe interpor potestativamente recurso de reposición ante o Consello de Dirección da Agader, no prazo dun mes contado desde o día seguinte ao da publicación desta resolución no DOG, ou recurso contencioso- administrativo ante o Xulgado do Contencioso Administrativo de Santiago de Compostela, no prazo de dous meses contados desde o día seguinte ao da citada publicación no DOG.
Décimo segundo Información aos interesados
Sobre estes procedementos administrativos, que teñen os códigos MR704A e MR704B, poderase obter documentación normalizada ou información adicional a través das seguintes canles:
a) Páxina web oficial da Agader (http://agader.xunta.es), na súa epígrafe de «Liñas de axuda».
b) O teléfono 981 54 73 82 da Agader.
c) Presencialmente, nas dependencias da Agader, no lugar da Barcia, nº 56, estrada Santiago-Noia, km 1, 15896 Santiago de Compostela.
Así mesmo, para cuestións xerais sobre este ou outros procedementos, poderá facerse uso do teléfono de información xeral da Xunta de Galicia, que é o 012 (desde fóra de Galicia, o 902 12 00 12).
Esta resolución aplicarase desde o día seguinte ao da súa publicación no DOG e o director xeral da Agader poderá ditar os actos necesarios para asegurar a súa correcta aplicación e execución.
Santiago de Compostela, 14 de marzo de 2014
P.D. (Resolución do 11.7.2013; DOG nº 148, do 5 de agosto)
Antonio Crespo Iglesias
Director xeral da Axencia Galega de Desenvolvemento Rural
